[A:16]pa'i gnas yin pas/ sngags kyi bzlas pa yang nan tan du gyis gsung nas/ zhwa ser legs pa gcig gi gnang sbyin yang stsal zer ro//
de nas slar yang skyor mo lung gi chos grwa de nyid du byon nas re shig bzhugs shing mkhas pa yon tan khri'i gzims spyil sogs su yang yang phebs nas bcom ldan 'das gtum po dkar po la rtse gcig tu gsol ba 'debs pa mdzad cing/ rgyun du yi ge bcu pa'i gsang sngags bzlas brjod 'grus par gnang bas dus der dbon po mi g.yo bar mtshan gsol yang zer ro//
bka' las kyang/ nged rang gi tshe 'dir yid dam gyi bsnyen bsgrub thog ma de mi g.yo ba dkar po 'di yin zhing/ nged lo dgu tsam 'gro dus srod tho rangs gzhan rkyen la ma bltos par bcom ldan 'das gtum po dkar po'i mngon rtogs dang bstod pa mkhan chen g.yag pas mdzad pa'i steng nas byas/ tsaNDa mahA ro Sha'i sngags mang du bzlas pa'i rjes la/ 'di nas bshad pa'i bogs 'byin sdigs mdzub kyi sbyor ba de byas/ res dpa' spo'i sems la gzengs mtho ba'i zil chen po 'bad med du yong gin yod pa/ phyir dkor 'dra zos pas yin yong lod du song 'dug go zhes dngos su thos pa'i ngag las legs par rtogs so//
gang sku rab mdzes lta bu yid 'phrog lta'i//
mthing sngon ral pa'i zur phud lta na sdug//
mdangs bkra 'od chags lcang lo'i tshogs de rnams//
dag byed chab kyis bkrus te spu gris sbyangs//
rab dregs lang tsho'i dkyil 'khor ma nyams pa//
ngur smrig gos kyis sgrib pas gsal min zhes//
sred ldan 'dod pa'i dga' ston la chags dag//
yid 'byung skyo ba'i sna glu ring nas len//
de thos lang tsho rgyas pa'i gzhon nu 'ga'//
mtshan dpe la chags rab zhi la khros nas//
dga' gdung 'khon 'dzin snang bas yid brel ba//
ri dgas smig rgyu rjes snyog rings pa'i tshul//
skye bar bag yod khrims kyi gos can khyod//
nam yang 'od pa'i g.yang la 'byon min zhes//