[A:15]gleng na ji ltar bgyi ba'i legs lam ston par zhu zhes gsol bas/ mkhas pa chen po des/ gzhon nu blo gsal ba theg chen rigs kyi rgyu nus can de nyid yongs su sad par bya ba'i phyir/ g.yag ma pham chos kyi bla ma dang/ rong ston pa shes bya kun rig ste g.yag rong rnam pa gnyis kyi rnam par thar pa dag rgya cher snyan 'jebs kyi gsung gis snyan dbang du bsgrags pa'i dbang las/ sngon gnas yongs su dran pa'i tshor ba drang srong nags su sleb pa'am/ ri dgas grong las thar pa ltar dga' ba dang/ skyo ba'i yid yongs su sbrel ba dag cig gi ting nge 'dzin la 'god par mdzad de/ lus skyes kyi spu long gi tshogs dag ni rab tu 'khrugs pa'i bsam gtan/ dpal ldan zla ba grags pas dbu ma la 'jug par/
rab tu dga' ba las byung mig ni mchi mas brlan//
lus kyi ba spu ldang bar 'gyur ba gang yin pa//
de la rdzogs pa'i sangs rgyas blo yi sa bon yod//
de nyid nye bar bstan pa'i snod ni 'di yin te//
sogs rigs sad kyi snang ba ji ltar byung tshul rgyal ba'i bka' dang dgongs 'grel gyi lung khyad par ba dag gis bsgrub par nus pa'i dbang las/ yid ches pa'i 'bras bu'i gtan tshigs yang dag pas brgyan par gyur to//
der bcom ldan 'das mi g.yo dkar po'i rjes su gnang ba dang rjes 'brel/ mkhan chen g.yag pas mdzad pa'i mi g.yo dkar po'i sgrub skor mi zad pa'i gter mdzod kyi lung yang stsal zhing/ yang bka' stsal du mdzad pa ni/ mdor na gang khyod kyi chos sgo len pa'i dge ba'i bshes su gyur pa ni/ rong ston pa nyid yin pas blo brtan pa dang/ bdud las kyang yongs su brgal ba'i go cha dang ldan par gyis shig// skyor mo lung gi chos grwa de nyid/ sngon mkhas pa yon tan khris/ bcom ldan 'das mi g.yo ba rigs lnga'i zhal legs par gzigs te/ lta ba bka' rtags kyi phyag rgya bzhi'i chos kyi sgo gsan