[A:16]པའི་གནས་ཡིན་པས། སྔགས་ཀྱི་བཟླས་པ་ཡང་ནན་ཏན་དུ་གྱིས་གསུང་ནས། ཞྭ་སེར་ལེགས་པ་གཅིག་གི་གནང་སྦྱིན་ཡང་སྩལ་ཟེར་རོ༎
དེ་ནས་སླར་ཡང་སྐྱོར་མོ་ལུང་གི་ཆོས་གྲྭ་དེ་ཉིད་དུ་བྱོན་ནས་རེ་ཤིག་བཞུགས་ཤིང་མཁས་པ་ཡོན་ཏན་ཁྲིའི་གཟིམས་སྤྱིལ་སོགས་སུ་ཡང་ཡང་ཕེབས་ནས་བཅོམ་ལྡན་འདས་གཏུམ་པོ་དཀར་པོ་ལ་རྩེ་གཅིག་ཏུ་གསོལ་བ་འདེབས་པ་མཛད་ཅིང། རྒྱུན་དུ་ཡི་གེ་བཅུ་པའི་གསང་སྔགས་བཟླས་བརྗོད་འགྲུས་པར་གནང་བས་དུས་དེར་དབོན་པོ་མི་གཡོ་བར་མཚན་གསོལ་ཡང་ཟེར་རོ༎
བཀའ་ལས་ཀྱང། ངེད་རང་གི་ཚེ་འདིར་ཡིད་དམ་གྱི་བསྙེན་བསྒྲུབ་ཐོག་མ་དེ་མི་གཡོ་བ་དཀར་པོ་འདི་ཡིན་ཞིང། ངེད་ལོ་དགུ་ཙམ་འགྲོ་དུས་སྲོད་ཐོ་རངས་གཞན་རྐྱེན་ལ་མ་བལྟོས་པར་བཅོམ་ལྡན་འདས་གཏུམ་པོ་དཀར་པོའི་མངོན་རྟོགས་དང་བསྟོད་པ་མཁན་ཆེན་གཡག་པས་མཛད་པའི་སྟེང་ནས་བྱས། ཙཎྜ་མཧཱ་རོ་ཥའི་སྔགས་མང་དུ་བཟླས་པའི་རྗེས་ལ། འདི་ནས་བཤད་པའི་བོགས་འབྱིན་སྡིགས་མཛུབ་ཀྱི་སྦྱོར་བ་དེ་བྱས། རེས་དཔའ་སྤོའི་སེམས་ལ་གཟེངས་མཐོ་བའི་ཟིལ་ཆེན་པོ་འབད་མེད་དུ་ཡོང་གིན་ཡོད་པ། ཕྱིར་དཀོར་འདྲ་ཟོས་པས་ཡིན་ཡོང་ལོད་དུ་སོང་འདུག་གོ་ཞེས་དངོས་སུ་ཐོས་པའི་ངག་ལས་ལེགས་པར་རྟོགས་སོ༎
གང་སྐུ་རབ་མཛེས་ལྟ་བུ་ཡིད་འཕྲོག་ལྟའི༎
མཐིང་སྔོན་རལ་པའི་ཟུར་ཕུད་ལྟ་ན་སྡུག༎
མདངས་བཀྲ་འོད་ཆགས་ལྕང་ལོའི་ཚོགས་དེ་རྣམས༎
དག་བྱེད་ཆབ་ཀྱིས་བཀྲུས་ཏེ་སྤུ་གྲིས་སྦྱངས༎
རབ་དྲེགས་ལང་ཚོའི་དཀྱིལ་འཁོར་མ་ཉམས་པ༎
ངུར་སྨྲིག་གོས་ཀྱིས་སྒྲིབ་པས་གསལ་མིན་ཞེས༎
སྲེད་ལྡན་འདོད་པའི་དགའ་སྟོན་ལ་ཆགས་དག༎
ཡིད་འབྱུང་སྐྱོ་བའི་སྣ་གླུ་རིང་ནས་ལེན༎
དེ་ཐོས་ལང་ཚོ་རྒྱས་པའི་གཞོན་ནུ་འགའ༎
མཚན་དཔེ་ལ་ཆགས་རབ་ཞི་ལ་ཁྲོས་ནས༎
དགའ་གདུང་འཁོན་འཛིན་སྣང་བས་ཡིད་བྲེལ་བ༎
རི་དགས་སྨིག་རྒྱུ་རྗེས་སྙོག་རིངས་པའི་ཚུལ༎
སྐྱེ་བར་བག་ཡོད་ཁྲིམས་ཀྱི་གོས་ཅན་ཁྱོད༎
ནམ་ཡང་འོད་པའི་གཡང་ལ་འབྱོན་མིན་ཞེས༎