[A:15]གླེང་ན་ཇི་ལྟར་བགྱི་བའི་ལེགས་ལམ་སྟོན་པར་ཞུ་ཞེས་གསོལ་བས། མཁས་པ་ཆེན་པོ་དེས། གཞོན་ནུ་བློ་གསལ་བ་ཐེག་ཆེན་རིགས་ཀྱི་རྒྱུ་ནུས་ཅན་དེ་ཉིད་ཡོངས་སུ་སད་པར་བྱ་བའི་ཕྱིར། གཡག་མ་ཕམ་ཆོས་ཀྱི་བླ་མ་དང། རོང་སྟོན་པ་ཤེས་བྱ་ཀུན་རིག་སྟེ་གཡག་རོང་རྣམ་པ་གཉིས་ཀྱི་རྣམ་པར་ཐར་པ་དག་རྒྱ་ཆེར་སྙན་འཇེབས་ཀྱི་གསུང་གིས་སྙན་དབང་དུ་བསྒྲགས་པའི་དབང་ལས། སྔོན་གནས་ཡོངས་སུ་དྲན་པའི་ཚོར་བ་དྲང་སྲོང་ནགས་སུ་སླེབ་པའམ། རི་དགས་གྲོང་ལས་ཐར་པ་ལྟར་དགའ་བ་དང། སྐྱོ་བའི་ཡིད་ཡོངས་སུ་སྦྲེལ་བ་དག་ཅིག་གི་ཏིང་ངེ་འཛིན་ལ་འགོད་པར་མཛད་དེ། ལུས་སྐྱེས་ཀྱི་སྤུ་ལོང་གི་ཚོགས་དག་ནི་རབ་ཏུ་འཁྲུགས་པའི་བསམ་གཏན། དཔལ་ལྡན་ཟླ་བ་གྲགས་པས་དབུ་མ་ལ་འཇུག་པར།
རབ་ཏུ་དགའ་བ་ལས་བྱུང་མིག་ནི་མཆི་མས་བརླན༎
ལུས་ཀྱི་བ་སྤུ་ལྡང་བར་འགྱུར་བ་གང་ཡིན་པ༎
དེ་ལ་རྫོགས་པའི་སངས་རྒྱས་བློ་ཡི་ས་བོན་ཡོད༎
དེ་ཉིད་ཉེ་བར་བསྟན་པའི་སྣོད་ནི་འདི་ཡིན་ཏེ༎
སོགས་རིགས་སད་ཀྱི་སྣང་བ་ཇི་ལྟར་བྱུང་ཚུལ་རྒྱལ་བའི་བཀའ་དང་དགོངས་འགྲེལ་གྱི་ལུང་ཁྱད་པར་བ་དག་གིས་བསྒྲུབ་པར་ནུས་པའི་དབང་ལས། ཡིད་ཆེས་པའི་འབྲས་བུའི་གཏན་ཚིགས་ཡང་དག་པས་བརྒྱན་པར་གྱུར་ཏོ༎
དེར་བཅོམ་ལྡན་འདས་མི་གཡོ་དཀར་པོའི་རྗེས་སུ་གནང་བ་དང་རྗེས་འབྲེལ། མཁན་ཆེན་གཡག་པས་མཛད་པའི་མི་གཡོ་དཀར་པོའི་སྒྲུབ་སྐོར་མི་ཟད་པའི་གཏེར་མཛོད་ཀྱི་ལུང་ཡང་སྩལ་ཞིང། ཡང་བཀའ་སྩལ་དུ་མཛད་པ་ནི། མདོར་ན་གང་ཁྱོད་ཀྱི་ཆོས་སྒོ་ལེན་པའི་དགེ་བའི་བཤེས་སུ་གྱུར་པ་ནི། རོང་སྟོན་པ་ཉིད་ཡིན་པས་བློ་བརྟན་པ་དང། བདུད་ལས་ཀྱང་ཡོངས་སུ་བརྒལ་བའི་གོ་ཆ་དང་ལྡན་པར་གྱིས་ཤིག༎ སྐྱོར་མོ་ལུང་གི་ཆོས་གྲྭ་དེ་ཉིད། སྔོན་མཁས་པ་ཡོན་ཏན་ཁྲིས། བཅོམ་ལྡན་འདས་མི་གཡོ་བ་རིགས་ལྔའི་ཞལ་ལེགས་པར་གཟིགས་ཏེ། ལྟ་བ་བཀའ་རྟགས་ཀྱི་ཕྱག་རྒྱ་བཞིའི་ཆོས་ཀྱི་སྒོ་གསན་