[A:315]cad la rtag par byams shing/ sems can gzhan la gnod pa'i laslus cung zad kyang mi mdzad/ gzhan la mtho mtshams pa dang phrag dog pa'i rnam pa cung zad kyang mi mnga'/ rnyed bkur dang che thabs kyi rtsol bsgrub cung zad kyang mi mdzad/ de'i rgyu mtshan gyis gzhan dag bla ma khong la mi chos med cing/ 'jig rten mi mkhyen ces zer/ de lta mod kyi kun rdzob kyi snang ba 'di chos nas ji ltar 'byung ba bzhin du khong zhal gyis bzhes shing phyag len du khel bar mdzad pas/ 'jig rten dang mi chos ni de yin par nges so//
gzhan yang bdag nyid chen po 'di gang na bzhugs pa'i sa phyogs der/ nad yams dang/ mu ge dang/ dus kyi 'khrug pa mi 'byung zhing/ yon gyi bdag po rnams la bkra shis pa'i dge mtshan kho na 'byung zhing/ 'byor pa che ba dang/ skye bo'i tshogs kyis gang ba dang/ thag ring po nas 'ongs pa'i grwa pa bu slob rnams rang gi ngang gis 'du ba la gegs dang/ nye bar 'tshe ba cung zad kyang mi 'byung ba yin no//
de'i rgyu mtshan gyis/ mkhas pa'i dbang po 'dis bshad nyan mdzad nas mya ngan las 'da' kha'i bar/ sku la snyung ba'i tshul bstan pa nyin gcig tsam yang 'byung ma myong par kun gyis 'thun snang du grub cing/ gangs can gyi ljongs 'dir bshad nyan gyi rgyun ma chad par mdzad pa la/ bdag nyid chen po 'di las rgyun ring ba'i slob dpon su yang med do//
yang mkhas pa gzhan dag ni 'chad pa kho na gtso bor mdzad cing/ bstan bcos rtsom par mi mdzad/ la la ni bstan bcos rtsom pa la gtso bor mdzad kyi/ 'chad pa dang rtsod pa lhur mi len/ mkhas pa'i bya ba rnam pa gsum cha mnyam par mdzad cing/ gsum ka la thogs pa med pa'i blo gros mnga' ba ni/ bdag nyid po 'di dang mnyam pa kha ba can 'dir gzhan byon pa med do//
yang mkhas pa la