[A:314]zhig mdzad pa ma gtogs mdzad pa gzhan ci yang mi snang ba'i phyir dang/ dngos 'dzin gyi 'khrul pa gting nas zhig pas 'jig rten chos brgyad kyi rnam par rtog pa rang sar grol nas/ 'jig rten gyi chos lugs gang la yang spang blang dang/ dgag bsgrub dang/ 'di yin dang 'di min gyi mtshan 'dzin gtad thub pa gang yang med pa byis pa gzhon nu'i spyod pa lta bu rtag tu mdzad pa'i phyir ro//
de lta mod kyi gsung rab kyi don la dpyod pa dang/ dgag bsgrub mdzad pa'i tshe ches shin tu sgrin por mdzad cing bstan pa 'ba' zhig lhag par dgongs so//
yang gsang sngags bla na med pa'i dam tshig dang sdom pa legs par mnos nas/ rtsa ba dang yan lag gnyis pas cung zad kyang ma gos shing/ dgyes pa rdo rje dang/ 'khor lo sdom pa'i thun bzhi'i rnal 'byor las zhag gcig kyang g.yel bar mi mdzad do//
de dag la 'di skad ces/
khyod kyi btsun pa'i yon tan 'od dkar can//
tshul 'chos nag po'i sprin gyis ma bsgribs par//
rang byung goms pa'i shugs stabs drang po yis//
tshul khrims rnam gsum yangs pa'i mkha' la shar//
1.2.4.3
bzang po'i yon tan ji ltar brnyes pa/
gsum pa bzang po'i yon tan ji ltar brnyes pa ni/
thugs rje chen pos rtag par rgyud phyug cing//
mtshan mar 'dzin pa'i 'ching ba las grol nas//
bstan la dgongs pa'i lhag bsam mthon po can//
sa thob sems dpa' che la phyag 'tshal lo//
de yang/ bdag nyid chen po 'di ni/ mtshan mo zhi lhag zung 'brel gyi rnal 'byor las g.yel ba mi mnga' zhing/ nyin mo stong nyid snying rje'i snying po can gyi ngang nas 'chad rtsod rtsom gsum gyi bya ba kho nas dus 'da' bar mdzad/ mtho dman thams