[A:314]ཞིག་མཛད་པ་མ་གཏོགས་མཛད་པ་གཞན་ཅི་ཡང་མི་སྣང་བའི་ཕྱིར་དང། དངོས་འཛིན་གྱི་འཁྲུལ་པ་གཏིང་ནས་ཞིག་པས་འཇིག་རྟེན་ཆོས་བརྒྱད་ཀྱི་རྣམ་པར་རྟོག་པ་རང་སར་གྲོལ་ནས། འཇིག་རྟེན་གྱི་ཆོས་ལུགས་གང་ལ་ཡང་སྤང་བླང་དང། དགག་བསྒྲུབ་དང། འདི་ཡིན་དང་འདི་མིན་གྱི་མཚན་འཛིན་གཏད་ཐུབ་པ་གང་ཡང་མེད་པ་བྱིས་པ་གཞོན་ནུའི་སྤྱོད་པ་ལྟ་བུ་རྟག་ཏུ་མཛད་པའི་ཕྱིར་རོ༎
དེ་ལྟ་མོད་ཀྱི་གསུང་རབ་ཀྱི་དོན་ལ་དཔྱོད་པ་དང། དགག་བསྒྲུབ་མཛད་པའི་ཚེ་ཆེས་ཤིན་ཏུ་སྒྲིན་པོར་མཛད་ཅིང་བསྟན་པ་འབའ་ཞིག་ལྷག་པར་དགོངས་སོ༎
ཡང་གསང་སྔགས་བླ་ན་མེད་པའི་དམ་ཚིག་དང་སྡོམ་པ་ལེགས་པར་མནོས་ནས། རྩ་བ་དང་ཡན་ལག་གཉིས་པས་ཅུང་ཟད་ཀྱང་མ་གོས་ཤིང། དགྱེས་པ་རྡོ་རྗེ་དང། འཁོར་ལོ་སྡོམ་པའི་ཐུན་བཞིའི་རྣལ་འབྱོར་ལས་ཞག་གཅིག་ཀྱང་གཡེལ་བར་མི་མཛད་དོ༎
དེ་དག་ལ་འདི་སྐད་ཅེས།
ཁྱོད་ཀྱི་བཙུན་པའི་ཡོན་ཏན་འོད་དཀར་ཅན༎
ཚུལ་འཆོས་ནག་པོའི་སྤྲིན་གྱིས་མ་བསྒྲིབས་པར༎
རང་བྱུང་གོམས་པའི་ཤུགས་སྟབས་དྲང་པོ་ཡིས༎
ཚུལ་ཁྲིམས་རྣམ་གསུམ་ཡངས་པའི་མཁའ་ལ་ཤར༎
1.2.4.3
བཟང་པོའི་ཡོན་ཏན་ཇི་ལྟར་བརྙེས་པ།
གསུམ་པ་བཟང་པོའི་ཡོན་ཏན་ཇི་ལྟར་བརྙེས་པ་ནི།
ཐུགས་རྗེ་ཆེན་པོས་རྟག་པར་རྒྱུད་ཕྱུག་ཅིང༎
མཚན་མར་འཛིན་པའི་འཆིང་བ་ལས་གྲོལ་ནས༎
བསྟན་ལ་དགོངས་པའི་ལྷག་བསམ་མཐོན་པོ་ཅན༎
ས་ཐོབ་སེམས་དཔའ་ཆེ་ལ་ཕྱག་འཚལ་ལོ༎
དེ་ཡང། བདག་ཉིད་ཆེན་པོ་འདི་ནི། མཚན་མོ་ཞི་ལྷག་ཟུང་འབྲེལ་གྱི་རྣལ་འབྱོར་ལས་གཡེལ་བ་མི་མངའ་ཞིང། ཉིན་མོ་སྟོང་ཉིད་སྙིང་རྗེའི་སྙིང་པོ་ཅན་གྱི་ངང་ནས་འཆད་རྩོད་རྩོམ་གསུམ་གྱི་བྱ་བ་ཁོ་ནས་དུས་འདའ་བར་མཛད། མཐོ་དམན་ཐམས་