[A:444]མ་ལྕམ་གྱིས་རྔོག་ཨཱརྻ་དེ་བ་ལ་བཤད། འདིས་རྗེ་བཙུན་གྲགས་པ་རྒྱལ་མཚན་ལ་ཡང་གཏུགས། ཨཱརྻ་དེ་བས་རྟག་པ་རིན་ཆེན་གྲགས་ལ་བཤད། དེ་ལ་ཀུན་མཁྱེན་ཆོས་སྐུ་འོད་ཟེར་གྱིས་གསན་ཏེ། འདི་ནི་ཁ་ཆེ་པཎ་ཆེན་གྱི་སྐྱེ་བར་གྲགས་ཤིང༌། བསྟན་བཅོས་ཐམས་ཅད་གཟིགས་པ་ཙམ་གྱིས་ཐུགས་སུ་ཆུད་པར་གྱུར་པས་ཀུན་མཁྱེན་ཞེས་ཀྱང་གྲགས་ཏེ། འདུས་པའི་བཤད་པ་ཡུན་རིང་དུ་མཛད་པས་སློབ་མའང་མང་དུ་བྱུང༌། ཁོང་གི་སློབ་མ་བླ་མ་འཕགས་འོད་ཅེས་པ་འཕགས་ཡོག་དུས་གསུམ་ལ་མཁས་པ། གདམས་པའི་
མཛོད་དུ་གྱུར་པ་དེས་ཁོང་ལ་གསན། འཕགས་འོད་ཀྱིས་ཐམས་ཅད་མཁྱེན་པ་བུ་རིན་པོ་ཆེ་ལ་
ཞ་ལུ་ཉིད་དུ་བྱོན་ཏེ། གསང་བ་འདུས་པ་དང་ཡོ་གའི་ཕྱག་ལེན་དང་བཤད་པ་མང་དུ་མཛད།
བུ་རིན་པོ་ཆེའང་འདུས་པ་ལ་ཤིན་ཏུ་མཁས་པར་གྱུར་ཏེ། འཕགས་པའི་གསུང་གིས་
བསྐུལ་བར་གྱུར་པས་སྒྲོན་མ་གསལ་བའི་ཊཱི་ཀ་ཆེན་མོ་མཛད། གཞན་ཡང་འདུས་པའི་
ཆོས་སྐོར་མང་དུ་བརྩམས། འགོས་ནས་སློབ་བརྒྱུད་རིམ་པར་བྱུང་བ་ལ་བུ་སྟོན་ཉིད་མཁས་པར་རྟོགས། དེས་འདུས་པའི་སྐོར་རྣམས་ཁྱུང་པོ་ལྷས་པ་གཞོན་ནུ་བསོད་ནམས་ལ་བཤད། དེ་ལ་
རྗེ་ཙོང་ཁ་པ་ཆེན་པོས་གསན་པ་ཡིན་ཏེ། དེ་ཡང་སྤྱིར་བསྟན་པ་ལ་ཕན་པ་རྒྱ་ཆེན་པོ་དང༌། བྱེ་བྲག་ཏུ་འདུས་པས་ས་སྟེངས་ཁྱབ་པར་གྱུར་པའི་བྱེད་པ་པོ་ནི་རྗེ་ཙོང་ཁ་པ་ཆེན་པོའོ།
།འདི་དག་ནི་འགོས་ལས་བརྒྱུད་པའི་གཏམ་རགས་པ་ཙམ་ཞིག་བཤད་པ་སྟེ། ཞིབ་པར་
བདག་གིས་བཤད་ག་ལ་ནུས།