[A:444]ma lcam gyis rngog ArYa de ba la bshad/ 'dis rje btsun grags pa rgyal mtshan la yang gtugs/ ArYa de bas rtag pa rin chen grags la bshad/ de la kun mkhyen chos sku 'od zer gyis gsan te/ 'di ni kha che paN chen gyi skye bar grags shing / bstan bcos thams cad gzigs pa tsam gyis thugs su chud par gyur pas kun mkhyen zhes kyang grags te/ 'dus pa'i bshad pa yun ring du mdzad pas slob ma'ang mang du byung / khong gi slob ma bla ma 'phags 'od ces pa 'phags yog dus gsum la mkhas pa/ gdams pa'i
mdzod du gyur pa des khong la gsan/ 'phags 'od kyis thams cad mkhyen pa bu rin po che la
zha lu nyid du byon te/ gsang ba 'dus pa dang yo ga'i phyag len dang bshad pa mang du mdzad/
bu rin po che'ang 'dus pa la shin tu mkhas par gyur te/ 'phags pa'i gsung gis
bskul bar gyur pas sgron ma gsal ba'i TI ka chen mo mdzad/ gzhan yang 'dus pa'i
chos skor mang du brtsams/ 'gos nas slob brgyud rim par byung ba la bu ston nyid mkhas par rtogs/ des 'dus pa'i skor rnams khyung po lhas pa gzhon nu bsod nams la bshad/ de la
rje tsong kha pa chen pos gsan pa yin te/ de yang spyir bstan pa la phan pa rgya chen po dang / bye brag tu 'dus pas sa stengs khyab par gyur pa'i byed pa po ni rje tsong kha pa chen po'o/
/'di dag ni 'gos las brgyud pa'i gtam rags pa tsam zhig bshad pa ste/ zhib par
bdag gis bshad ga la nus/