[A:445]བསམ་ཡས་ཀྱི་ལྷ་བཙུན་སྔོན་མོས་ཆོས་འཁོར་བཙུགས་པའི་
དུས་སུ། །གསང་འདུས་འཕགས་སྐོར་ལ་མཁས་པ་ཤུང་ཀེ་དར་མ་རྡོ་རྗེ་དང༌། དབུས་པ་འཕགས་སྐོར་ལ་མཁས་པ་སྤ་ཚབ་ལོ་ཙཱ་བ་གཉིས་སྤྱན་དྲངས་པས། སྤ་ཚབ་གསང་འདུས་ལ་
མོན་ནས་ཤུང་ཀེ་ལ་གསན་པས་འགྱུར་ལ་མ་མཉེས་ནས། པནྚི་ཏ་ཏི་ལ་ཀ་ཀ་ལ་ཤས་མཛད་ནས་
སྤ་ཚབ་ལོ་ཙཱ་བས་འགྱུར་ཡང་རྒྱུད་འགྲེལ་ཕྲན་དང་བཅས་པ་ལ་མཛད་ཅིང་ལེགས་པར་བསྒྱུར། བཤད་པ་
ཡང་མཛད་དོ།
།དིང་སང་གི་བར་དུ་བརྒྱུད་པ་བཞུགས་པ་ནི་མ་མཐོང་ངོ༌། ། ཆག་ཆོས་རྗེ་དཔལ་གྱིས་
ཀྱང་དང་པོར་རྔོག་མུན་ནེའི་སློབ་མ་ཇོ་བཙུན་རྟག་པ། དེའི་སློབ་མ་གུང་ཐང་གི་
ཇོ་བོ་ལྷ་མགོན་པོ་དཔལ་ཞེས་པ་ལ་གསང་འདུས་འགོས་ལུགས་བསླབས། དེ་ནས་
བལ་ལོའི་པནྚི་ཏ་ཉི་མའི་དབང་པོའི་འོད་ཟེར་ལ་ལེགས་པར་མཉན་ནས། རྒྱུད་འགྲེལ་དང་
མདོར་བྱས་རིམ་ལྔ་སོགས་ཀྱི་འགྱུར་ཡང་བཅོས། །སྒྲོན་གསལ་གྱི་བསྡུས་པའི་
དོན་དང་ཊཱིཀ་ཡང་མཛད་དེ་སྐྱེ་བོ་མང་པོ་ལ་ཕན་པར་མཛད་དོ། ཡང་ཁ་ཆེ་ཟླ་བ་མགོན་པོས་
སྒོམ་པ་དཀོན་མཆོག་བསྲུངས་ལ་སྒྲོན་གསལ་མན་ངག་གི་བཤད་པ་དང་བཅས་ཏེ་གནང་ཞེས་འབྱུང་བ་ལ། དིང་སང་དེའི་དཔེ་ལ་སོགས་པ་ནི་མཐོང་བར་མ་གྱུར་ཏོ།
།འདུས་པ་འཕགས་ལུགས་ཀྱི་སྐབས་སོ། །