[A:༤༩༧]གུས་བསྟེན་བསྙེན་པར་རྫོགས་པའི་སྡོམ་པ་བཞེས། །དགེ་སློང་རྡོ་རྗེ་འཛིན་ལ་གསོལ་བ་འདེབས། །ཞེས་གོང་དུ་སྨོས་པའི་གསན་བསམ་མཐར་ཕྱིན་པར་མཛད་པ་དེ་དག་གོ་ཡུལ་ཙམ་དུ་མ་ལུས་པར་ཐུགས་ཉམས་སུ་བསྟར་བས། ཐམས་ཅད་མཁྱེན་པ་མཁྱེན་བརྩེས་གསོལ་འདེབས་ལས། བརྗོད་བྲལ་བདེ་ཆེན་གནས་ལུགས་མངོན་གྱུར་ཀྱང༌། །རིམ་གཉིས་བཟླས་པར་བཅས་པའི་རྣལ་འབྱོར་ལ། །ནམ་ཡང་གཡེལ་མེད་སྒྲུབ་པ་ལྷུར་ལེན་པའི། །གྲུབ་པའི་གཙུག་རྒྱན་མཆོག་ལ་གསོལ་བ་འདེབས། །ཞེས་པའི་དོན་ལྟར་བསྙེན་སྒྲུབ་ཀྱི་རིམ་པ་མཛད་པ་ཨཥྟའི་བསྙེན་ཆེན་ནཱ་ལེནྡྲ་གསུང་ངག་གནང་བའི་སྔ་རོལ་ནས་སོང་ཟིན་པ་དང་སྔ་ཕྱིར་བདེ་མཆོག་ཡབ་བཀའ་ཡུམ་བཀའ། འཇིགས་བྱེད། གཤེད་དམར། ཕུར་པ། མགོན་པོ་ཆེ་ཆུང་སོགས་ཡི་དམ་ཆོས་སྐྱོང་མང་པོའི་ལྗགས་བསྙེན་དུས་རྟགས་གྲངས་ཚད་དུ་ཐོན་པར་མ་ཟད་རྒྱུན་དུའང་ཉིན་མཚན་ཁོར་ཡུག་ཏུ་ཐུགས་དམ་གྱི་རིམ་པ་གཉིས་ཀྱི་རྣལ་འབྱོར་ཟབ་མོས་དུས་འདའ་ཞིང་སྔགས་ཀྱི་བཟླས་པའང་ཉིན་ཞག་རེའི་ཁོངས་སུ་ཨཥྟ། ཨོཾ་གསུམ་མ། ཡ་མ་རཱ་ཛཱ། ཤཱ་ས་ན། ས་ཕུར་གྱི་སྙིང་པོ་རྣམས་སོ་སོར་སྟོང་ཕྲག་རེ་ཆག་མེད་དུ་མཛད་ཅིང༌། བཀའ་ལས། ངས་གསང་སྔགས་གསར་རྙིང་གི་སྔགས་ཕལ་ཆེར་བསྙེན་ཚད་བཞིན་མ་བཟླས་པ་ཡེ་མེད། དེ་རྣམས་ཀྱི་ནང་ནས་མགོན་པོའི་སྔགས་ཤཱ་ས་ན་འདི་ནུས་པ་ཆེ་ཤོས་ལ་འདུག་སྟེ། འདི་བགྲངས་པས་འཕྲེང་བ་ལ་དངོས་སུ་མེ་འབར་བ་ཡོང་གིན་འདུག །ཅེས་གསུངས། སྐབས་ཤིག་ཞལ་གྱི་བསྙེན་པ་གནང་