[A:༤༩༨]བའི་ཚེ་ཐོག་མར་ཅུང་ཟད་འཚུབ་པའི་རྣམ་པ་དང་རྗེས་སུ་གཟིགས་སྣང་ལ་བར་སྣང་ནས་གོས་ཆེན་ལྕགས་ནག་གི་ཕོད་ཀ་ཆེན་པོ་གྱོན་པ་ཞིག་གིས་ཕུ་ཐུང་གི་སྦུགས་ནས་ལག་པ་ཆེན་པོ་ཡང་ཡང་སྟོན་པ་སོགས་བྱུང་བའང་ཆོས་སྐྱོང་གིས་དངོས་སུ་རྗེས་སུ་བཟུང་བའི་ཆོ་འཕྲུལ་དུ་སྣང༌། གཞན་ཡང་གྲུམ་སྟོད་ཁའུའི་བྲག་རྫོང་དུ་བཞུགས་པའི་དུས་ཐུགས་རྒྱུད་ལ་ཉམས་དང་རྟོགས་པ་ཏིང་ངེ་འཛིན་གྱི་འཆར་སྒོ་བསམ་གྱིས་མི་ཁྱབ་པ་འཁྲུངས་ཤིང་དབང་ལས་བྱུང་བའི་ཡེ་ཤེས་ཁྱད་པར་ཅན་ལམ་གྱི་དུས་སུ་གོང་ནས་གོང་དུ་འཕེལ་བ་དྲི་མ་དང་བྲལ་བ་ཕྱག་རྒྱ་ཆེན་པོའི་ཡེ་ཤེས་ལ་དབང་འབྱོར་བར་མཛད། འཕན་ཡུལ་བྱ་བཟང་དུ་བཞུགས་པའི་ཚེ། བཀའ་ལས། ཉི་མ་དགོངས་ཕྱོགས་སྐྱོ་བསངས་བྱས་པའི་ཚེ་མདུན་གྱི་སྤང་གཤོང་ལ་གོང་མོ་མང་པོ་རྩེ་ཞིང༌། རྒྱབ་ཀྱི་ཐང་ལ་ཕྱུག་རྗི་གཞོན་ནུ་མང་པོ་ཤིང་འཐུ་ཞིང་རྩེད་མོ་བྱེད་པ་མཐོང་བས་འདི་དག་ཀྱང་བསམས་ན་དགེ་སྦྱོང་གི་བསྐུལ་མར་འདུག་སྙམ་ནས་རང་སེམས་ལ་གསལ་འདེབས་སུ་སྨྲས་གསུང་བའི་ཉམས་གླུ་གནང་བའི་སྐབས་ཡུན་རིང་དུ་བཞུགས་ཤིང་ཐུགས་དམ་གྱི་བོགས་ཤིན་ཏུ་ཆེ་བར་བྱུང༌། ཆུ་བོ་རིར་ཕེབས་པའི་ཚེ་བྲག་ཕུག་ཏུ་སྒྲུབ་པ་མཛད་པས་དཔའ་བོ་དང་མཁའ་འགྲོ་མས་ཚོགས་ཀྱི་འཁོར་ལོས་མཆོད་ཅིང་ཐུགས་ཉམས་ཀྱི་ངང་ནས་རྡོ་རྗེའི་ལུས་ཀྱི་རྩ་འཁོར་གྱི་ལྷ་རྣམས་གསལ་བར་གཟིགས་པས། གསུང་མགུར་ལས། གནས་སྤྱི་བོ་བདེ་ཆེན་གྱི་རི་བོའི་སྤོར། །རྗེ་སྐུ་ཡི་རྡོ་རྗེ་ཡབ་ཡུམ་བཞུགས། །མ་མཁའ་འགྲོ་སོ་གཉིས་ཀྱི་འཁོར་གྱིས་བསྐོར། །སྐུ་ཟླ་ཤེལ་གསར་པའི་མདངས་འོད་ཅན། །ཕ་