[A:༤༩༦]ངང་ཚུལ་དང་མཚུངས་སོ། །བཅུ་ཕྲག་དྲུག་ལྷག་ཡོངས་འཛིན་ཆུ་གཏེར་ཀློང༌། །མཁྱེན་དཔྱོད་བརྩོན་པའི་རི་བོ་བསྒྲིལ་བ་ལས། །ལེགས་བཤད་ཉིན་བྱེད་ཐོན་པའི་འོད་སྟོང་གིས། །གངས་ཅན་བསྟན་པའི་སྣང་བ་ཆེས་ཆེར་དཀར། །ཐུབ་གསུང་དགོངས་འགྲེལ་མེས་པོའི་རལ་ཀླུང་ལས། །ལྔ་རིག་ཤེས་བྱའི་ཡན་ལག་བརྒྱད་ལྡན་རྒྱུན། །བློ་གྲོས་ལྟོ་བར་འཛིན་པའི་དྲང་སྲོང་ཁྱོད། །སྔོན་མེད་ཛཧྣུ་ཡི་མཆེད་པོ་བཞིན། །བཤེས་གཉེན་བསྟེན་ལ་མི་ངལ་ཀུན་དགའ་བོ། །བགྲང་ཡས་བཀའ་རྣམས་སྡུད་པོར་འོད་སྲུངས་ཆེ། །རྣམ་པར་འབྱེད་པའི་ཤེས་རབ་ཤཱ་རིའི་བུའི། །ངང་ཚུལ་ཟླ་གཟུགས་གངས་ཅན་ཆུ་མཚོར་ཤར། །དྲང་ངེས་གནད་གསང་དབྱེ་བ་འོད་གཟིའི་མདངས། །མཁས་རློམས་ནཻ་རུ་ཀ་དཔལ་བཟོད་མིན་ཡང༌། །མཐའ་ཀླས་ཆོས་ཀྱི་དཀྱིལ་འཁོར་བཅུ་གཉིས་ཆར། །བརྡར་ནུས་བི་ཤྭ་ཀརྨ་དེང་འདིར་འགྲུབ། །དེ་ཡང་སྔར་དབུས་ནས་བོ་དོང་དུ་ཕེབས་པའི་སྔོན་དུ་བསྙེན་རྫོགས་ལོ་རྩིས་ཀྱི་ཡོང་དགོས་རྒྱུར་འདུག་རུང་ཐོག་མ་ནས་ལོ་ཟླ་སོགས་དུས་ཚིགས་ངེས་སྦྱར་གྱི་ས་བོན་ཞིག་མེད་འདུག་གཤིས། མཛད་པ་འགངས་ཆེ་བ་རྣམས་ཕྱོགས་སུ་བསྡོམས་པའི་གསོལ་འདེབས་ཀྱི་གོ་རིམ་ལྟར་བྱས་པ་འགལ་མེད་དུ་རྟོགས་པས། གསོལ་འདེབས་ལས། གྲུབ་པའི་གནས་མཆོག་ཁའུ་བྲག་རྫོང་དང༌། །མང་མཁར་ཆ་ལུང་རྡོ་རྗེའི་བྲག་རྫོང་སོགས། །དབེན་པའི་རི་ཁྲོད་རྣམས་སུ་ཟབ་མོའི་ལམ། །རྩེ་གཅིག་ཉམས་སུ་བཞེས་ལ་གསོལ་བ་འདེབས། །མཚུངས་བྲལ་བཤེས་གཉེན་སྡོམ་བརྩོན་དབང་པོ་མཆོག །ཡོངས་རྫོགས་མཁན་པོ་གྲགས་པ་རྒྱལ་མཚན་ཞབས། །