[A:496]ngang tshul dang mtshungs so/ /bcu phrag drug lhag yongs 'dzin chu gter klong / /mkhyen dpyod brtson pa'i ri bo bsgril ba las/ /legs bshad nyin byed thon pa'i 'od stong gis/ /gangs can bstan pa'i snang ba ches cher dkar/ /thub gsung dgongs 'grel mes po'i ral klung las/ /lnga rig shes bya'i yan lag brgyad ldan rgyun/ /blo gros lto bar 'dzin pa'i drang srong khyod/ /sngon med dzahnu yi mched po bzhin/ /bshes gnyen bsten la mi ngal kun dga' bo/ /bgrang yas bka' rnams sdud por 'od srungs che/ /rnam par 'byed pa'i shes rab shA ri'i bu'i/ /ngang tshul zla gzugs gangs can chu mtshor shar/ /drang nges gnad gsang dbye ba 'od gzi'i mdangs/ /mkhas rloms nai ru ka dpal bzod min yang / /mtha' klas chos kyi dkyil 'khor bcu gnyis char/ /brdar nus bi shwa karma deng 'dir 'grub/ /de yang sngar dbus nas bo dong du phebs pa'i sngon du bsnyen rdzogs lo rtsis kyi yong dgos rgyur 'dug rung thog ma nas lo zla sogs dus tshigs nges sbyar gyi sa bon zhig med 'dug gshis/ mdzad pa 'gangs che ba rnams phyogs su bsdoms pa'i gsol 'debs kyi go rim ltar byas pa 'gal med du rtogs pas/ gsol 'debs las/ grub pa'i gnas mchog kha'u brag rdzong dang / /mang mkhar cha lung rdo rje'i brag rdzong sogs/ /dben pa'i ri khrod rnams su zab mo'i lam/ /rtse gcig nyams su bzhes la gsol ba 'debs/ /mtshungs bral bshes gnyen sdom brtson dbang po mchog /yongs rdzogs mkhan po grags pa rgyal mtshan zhabs/ /