[A:༤༩༥]ནས་སྙིང་པོའི་དོན་བཙལ་བས། །སྦས་དོན་རླུང་གི་ཟབ་གནད་འཚོལ་བ་ལ། །གནད་དུ་ཆེ་བས་རྩིས་ཚུལ་བཞིན་དུ་བསླབས། །གཅིག་ཤེས་ཀུན་ལ་མཁས་ན་རྟོག་གེ་པའི། །ཡུན་རིང་ངལ་བྱས་རྣམས་ཀྱི་ཁེངས་པ་བསྟུངས། །ཞེས་པ་ལྟར་ཡིན་ཞིང༌། དེ་ཡང་སྡོམ་གསུམ་དུ། །ལྷ་ཆེན་སྐད་ངན་ཤོར་བ་ལ། །སྡུག་བསྔལ་བདེན་པ་མཐོང་ཞེས་གྲགས། །ཞེས་པ་ལྟར། ལོག་པའི་བཤེས་ཀྱི་རྫུན་ཚིག་དང་ཆོས་མ་ཡིན་པ་སྨྲ་བ་ལྟ་བུའི་འཆད་ཉན་གྱི་གཟུགས་བརྙན་ཙམ་ལ་མཐའ་ཅི་བཀག །དྲག་ཤུལ་ཅན་གྱིས་ཞུས་པའི་མདོ་ལས། གལ་ཏེ་བྱང་ཆུབ་སེམས་དཔའ་ལུང་ནོད་པའམ་སྦྱིན་པ་དང་ལྡན་པའམ་ཚུལ་ཁྲིམས་དང་ལྡན་པའམ་བཟོད་པ་དང་ལྡན་པའམ་བརྩོན་འགྲུས་དང་ལྡན་པའམ་བསམ་གཏན་དང་ལྡན་པའམ་ཤེས་རབ་དང་ལྡན་པའམ་བྱང་ཆུབ་སེམས་དཔའི་ལམ་གྱི་ཚོགས་གསོག་པ་དང་ལྡན་པའི་ཚིག་བཞི་པའི་ཚིགས་སུ་བཅད་པ་སུ་ལས་ཉན་ཏམ་ལུང་ནོས་སམ་བླངས་པའི་སློབ་དཔོན་དེ་ལ་དེས་ཆོས་ཀྱི་གུས་པར་བྱའོ། །མིང་དང་ཚིག་དང་ཡི་གེ་ཇི་སྙེད་པ་དེ་སྙེད་ཀྱིས་བསྐལ་པར་གལ་ཏེ་སློབ་དཔོན་དེ་ལ་གཡོ་མེད་པར་རྙེད་པ་དང་བཀུར་སྟིས་རིམ་གྲོ་བྱས་ཀྱང་ད་དུང་སློབ་དཔོན་དེ་ལ་གུས་པར་བྱ་བ་ཡོངས་སུ་རྫོགས་པར་བྱ་བ་མ་ཡིན་ན་ཆོས་མ་ཡིན་པས་གུས་པར་བྱས་པ་ལྟ་ཅི་སྨོས་ཞེས་གསུངས་པ་དང་མཐུན་པར་བཤེས་གཉེན་དེ་དག་རྣམས་ལ་མཉེས་པ་གསུམ་གྱི་སྒོ་ནས་གུས་པ་ལྷུར་མཛད་པའི་རྣམ་པར་ཐར་པ་ནི། འབྲོམ་སྟོད་ཆོས་ཀྱི་རྒྱལ་པོས་བླ་མ་སེ་བཙུན་དང༌། སེ་སྟོན་ཀུན་རིག་གིས་རྗེ་བཙུན་འབྲོག་མིའི་ཞབས་བསྟེན་པའི་