[A:༤༩༤]པའི་དབང་ལུང་འཁྲིད་མཐའ་ཡས་པ། རྗེ་བཙུན་གོང་མ་ལྔའི་བཀའ་འབུམ་སོགས་རྒྱ་བོད་ཀྱི་མཁས་གྲུབ་མང་པོའི་གསུང་གིས་མཚོན་གསན་པ་མཐའ་དག་བྲིར་མ་ལང་པས་གསན་ཡིག་སོགས་གཞན་དུ་ཤེས་པར་བྱའོ། །དེ་ལྟར་ཡོངས་འཛིན་མང་དུ་བསྟེན་ནས་གསན་པའི་ཆོས་རྣམས་ཀྱང་དག་དང་མ་དག་པའི་ཤན་ལེགས་པར་ཕྱེ་བས་ཚིག་གི་ཆ་ལ་ལུང་དང་རིགས་པས་སྒྲོ་འདོགས་རྣམ་པར་བཅད། དོན་གྱི་ཆ་ཐེག་དམན་བྱང་སེམས་གསང་སྔགས་སོགས་ཐེག་པ་སོ་སོའི་ཆེད་དུ་བྱ་བའི་གདུལ་བྱ་རྣམས་སོ་སོའི་ཁམས་དང་དབང་པོར་འཚམ་པའི་ནད་ཐོག་ཏུ་སྨན་བཞིན་གང་ལ་གང་འདུལ་གྱི་སྒོ་ནས་ཐར་པའི་ལམ་ལ་བཀྲི་བའི་གནད་འགག་མ་འདྲེས་པ་ཐུགས་སུ་ཆུད་པར་མཛད་པས། འཇམ་དབྱངས་ས་པཎ་གྱིས། བསྲེགས་བཅད་བརྡར་བའི་ཆོ་གས་གསེར་གྱི་ཁམས། །སྦྱོང་པའི་རིམ་བཞིན་དགག་གཞག་སྤང་གསུམ་གྱིས། །གཞུང་ལུགས་འབུམ་སྡེའི་ལྷད་ཀུན་འབྱིན་པ་ལ། །ཀུན་དགའི་རྒྱལ་མཚན་འཛིན་ཁྱོད་བསྐོས་པ་སྙམ། །ཞེས་པའི་དོན་དང་མཚུངས་ཤིང་རྟོག་གེ་དང་ཐ་སྙད་སོགས་གཙུག་ལག་མང་པོར་མཁྱེན་པའི་སྤྱན་ཡངས་པས། མཁས་པའི་གསུང་ལས། སྙན་ངག་མངོན་བརྗོད་སྡེབ་སྦྱོར་ཟློས་གར་དང༌། །རྩིས་བཟོ་གསོ་བ་སྒྲ་ཚད་ནང་དོན་རིག །སྐྱེ་བར་འགྲོགས་པས་དེ་དག་སྲེད་པ་བཞིན། །མཐོང་བའི་མོད་ལ་དེ་ཡི་བློ་དང་འཐམས། །ཞེས་པའི་དོན་ཐོག་ཏུ་བབས་པར་མ་ཟད་གཙོ་བོར་གསང་སྔགས་རྡོ་རྗེ་ཐེག་པའི་སྨིན་གྲོལ་མན་ངག་གི་གནད་ལ་བྱང་ཆུབ་པས། ཐ་སྙད་བསླབ་པ་ཆུ་འདོད་སྨིག་རྒྱུའི་རྗེས། །སྙེགས་ལྟར་མཐོང་