[A:494]pa'i dbang lung 'khrid mtha' yas pa/ rje btsun gong ma lnga'i bka' 'bum sogs rgya bod kyi mkhas grub mang po'i gsung gis mtshon gsan pa mtha' dag brir ma lang pas gsan yig sogs gzhan du shes par bya'o/ /de ltar yongs 'dzin mang du bsten nas gsan pa'i chos rnams kyang dag dang ma dag pa'i shan legs par phye bas tshig gi cha la lung dang rigs pas sgro 'dogs rnam par bcad/ don gyi cha theg dman byang sems gsang sngags sogs theg pa so so'i ched du bya ba'i gdul bya rnams so so'i khams dang dbang por 'tsham pa'i nad thog tu sman bzhin gang la gang 'dul gyi sgo nas thar pa'i lam la bkri ba'i gnad 'gag ma 'dres pa thugs su chud par mdzad pas/ 'jam dbyangs sa paN gyis/ bsregs bcad brdar ba'i cho gas gser gyi khams/ /sbyong pa'i rim bzhin dgag gzhag spang gsum gyis/ /gzhung lugs 'bum sde'i lhad kun 'byin pa la/ /kun dga'i rgyal mtshan 'dzin khyod bskos pa snyam/ /zhes pa'i don dang mtshungs shing rtog ge dang tha snyad sogs gtsug lag mang por mkhyen pa'i spyan yangs pas/ mkhas pa'i gsung las/ snyan ngag mngon brjod sdeb sbyor zlos gar dang / /rtsis bzo gso ba sgra tshad nang don rig /skye bar 'grogs pas de dag sred pa bzhin/ /mthong ba'i mod la de yi blo dang 'thams/ /zhes pa'i don thog tu babs par ma zad gtso bor gsang sngags rdo rje theg pa'i smin grol man ngag gi gnad la byang chub pas/ tha snyad bslab pa chu 'dod smig rgyu'i rjes/ /snyegs ltar mthong