[A:༤༧༩]མཐེབ་ཀོར་གྱི་རྒྱ་ཙམ་ཞིག་བྱུང་བ་དེ་ཞལ་དུ་ལྷག་མ་མ་ལུས་པར་གསོལ་བས་བརྒྱུད་པ་ཟིན་པའི་རྟེན་འབྲེལ་འགྲིག །མཆོད་འབུལ་དང་དགོངས་རྫོགས་ཀྱི་རིམ་པ་རྒྱ་ཆེར་སྤེལ་བའི་ཁུར་བཞེས་མཛད། ཉིན་གཅིག་སྤྲིན་དཀར་གྱི་ཕུང་པོའི་གསེབ་ན་སེང་གེ་གཉིས་ཀྱིས་བཏེག་པའི་རིན་པོ་ཆེའི་ཁྲིའི་སྟེང་ན་རྡོ་རིང་རིན་པོ་ཆེ་སྐུའི་དབྱིབས་དང་ཆ་བྱད་ཇི་ལྟ་བ་བཞིན་གསལ་བར་གཟིགས་ཏེ་དབུགས་དབྱུང་གཟེངས་བསྟོད་བྱིན་རླབས་མཛད། ཚར་ཆེན་ཉིད་ཀྱིས་མཛད་པའི་གསོལ་འདེབས་ལས། སླར་ཡང་འོད་གསལ་ངང་ལས་སྐུ་བཞེངས་ཏེ། །སེང་གེའི་ཁྲི་ལ་ཞབས་སེན་པདྨ་བཀོད། །འཛུམ་ཞལ་བདུད་རྩིའི་རྒྱུན་གྱིས་སྐལ་ལྡན་གྱི། །སྙིང་གི་གདུང་བ་བསལ་ལ་གསོལ་བ་འདེབས། །ཞེས་སོ། །དེའི་ཚེ་རྗེ་བཙུན་རྡོ་རྗེ་རྣལ་འབྱོར་མ་མངོན་སུམ་དུ་ཞལ་བསྟན་པའི་ངོ་མཚར་གྱི་སྣང་བ་ཅི་ཡང་ཤར་ཞིང༌། རྡོ་རིང་རིན་པོ་ཆེར་བྱིན་རླབས་གསན་པའི་དུས་བར་སྣང་གི་སྤྲིན་གསེབ་ནས་རྗེ་བཙུན་མའི་སྐུ་གཟིགས་པར་བརྟེན་ཆོས་རྗེ་ལ་མཁའ་སྤྱོད་མའི་བྱིན་རླབས་བྱས་རེས་ཀྱིས་རྟགས་ཁྱད་པར་ཅན་རེ་ཡོང་གི་འདུག་གསུང་བའང་འདི་རིགས་ལ་དགོངས་སོ། །དབྱངས་ཅན་བཞད་པའི་སྒྲིབ་བྲལ་མཁྱེན་མཚོའི་ནང༌། །མཆོག་སྲེད་སྤྲུལ་པའི་གར་དང་ལས་སྨོན་གྱིས། །འབྲེལ་བའི་གཟུགས་བརྙན་ཤར་ནས་ལུང་སྟོན་པ། །རྣམ་གསུམ་དམ་པའི་ཡོན་ཏན་དངོམ་པ་བཞིན། །མི་བཟད་དུག་གི་རླངས་འཁྲིགས་ས་བདག་གདོན། །སྲོག་རྩ་དྲག་སྔགས་མ་གི་ཏས་བཅད་དང༌། །ལྷན་ཅིག་ཆོས་སྲུང་རྭ་རྩེས་ཀླུ་གཉན་བྱད། །ཉེར་བཀྲོལ་