[A:༤༧༨]གེ་རྩེ་བའི་མངའ་ཐང་མྱུར་དུ་འཇིག་པ། རྗེ་ཉིད་ཀྱི་སྐུ་ཚེའི་ཚད། སྣོད་ལྡན་གྱི་སློབ་མ་རགས་རིམ་ཡོང་བ་དང་ཆོས་སྟོན་པའི་དུས་ཚོད། སྐུ་ཚེ་ཕྱི་མའི་སྐོར་སོགས་ཀྱི་ལུང་བསྟན་ཤིན་ཏུ་རྒྱས་པ་ཡོད་འདུག་ཀྱང་དེང་སང་ཟིན་བྲིས་སོགས་གསལ་བར་མི་སྣང༌། རྡོ་རྗེ་དྲིལ་བུ་སྔར་ཐུགས་བེད་སྤྱད་པའི་ལེགས་པ་ཞིག་གནང་སྟེ་ཆོས་རྗེ་རང་འདི་དཀྲོལ་ནས་དབང་བསྐུར་གཞན་དོན་རྒྱ་ཆེན་པོ་མཛོད་ཅིག་གསུངས། གཞན་དངོས་པོའི་གནང་སྦྱིན་གྱི་རིགས་ཞུ་ཡི་མེད་འདུག་ཀྱང་ད་ལམ་སྐུ་ཁམས་ཧྲེབ་པས་རྟེན་འབྲེལ་འཕྱུགས་དོགས་ཞུ་བ་མཛད། ཉིན་གཅིག་སྐུ་སྲུང་ཁྲོད་ནས་འཕགས་པ་དང་བདག་ཆེན་རིན་པོ་ཆེ་གཉིས་ཀྱི་བདུད་རྩི་རིལ་བུ་དང་སྒྲུབ་ཡིག་བདག་ཆེན་རྡོ་རྗེ་འཆང་གིས་མཛད་པ་གནང༌། རྗེ་བཙུན་རིན་པོ་ཆེའི་བདུད་རྩིའི་ཕབས་རྒྱུན་དང་སྒྲུབ་སྣོད་རྣམས་བླ་བྲང་ཤར་པར་ཡོད་པས་སྐུ་ཉེ་ཡིན་གཤིས་གཡར་པོ་མཛད་ན་ཡོང༌། བདག་ཆེན་རིན་པོ་ཆེའི་བདུད་རྩི་རིལ་བུ་འདི་ཁར་སོང་ན་སྐྱེ་བ་བཅུ་གཉིས་ཚུན་ལ་སངས་རྒྱས་ཐོབ་པའི་ལུང་བསྟན་ཐེངས་གསུམ་བྱུང༌། བདག་ལ་སྒྲུབས་ཤིག་པར་བཀའ་སྩལ་ཀྱང་མ་གྲུབ་ཁྱེད་ཀྱིས་སྒྲུབས་ཤིག་ཅེས་སྐུ་དཔུང་སྟེང་དུ་ཕྱག་གིས་ཅབ་ཅབ་མཛད་བྱུང་བར། སྔར་སེམས་དཔའ་ཆེན་པོ་ལའང་ཐོག་མར་མཛད་དཀའ་བྱུང་བའི་འཕྲོས་འདུག་པས་བདག་གིས་མི་འོང་ངམ་ཞུ་བ་གནང་བར་ཡིག་ཆ་འདི་གསལ་པོ་ཡིན་པས་འདི་སྟེང་ནས་མཛད་ན་འགྲུབ་གསུངས། ཧོར་ཟླ་བཅུ་པའི་ཚེས་བཅོ་ལྔ་ལ་ཀུན་སྤངས་ཆེན་པོ་དག་པའི་ཞིང་དུ་གཤེགས་པའི་ཚུལ་བསྟན་པའི་བཞུགས་གདན་གྱི་ཁར་བྱང་སེམས་དཀར་པོ་