[A:༤༠༥]འཇིག་རྟེན་ཁམས་འདི་སོ་སོ་དག་ལ་སླར་ཡང་ཁོར་ཡུག་རི་བོ་ཆེན་པོ་དག་ནི་ཀུན་ནས་སོ། །དེ་ཡི་དབུས་སུ་ལས་ཀྱི་ས་ནི་ཆེན་པོ་དག་གི་རང་བཞིན་འཇིག་རྟེན་ཁམས་སུ་རབ་ཏུ་འགྱུར། །ལྷག་མ་ལོངས་སྤྱོད་རང་བཞིན་ཡུལ་གྱི་བདེ་བ་བྱེད་པ་རིན་ཅེན་ཀུན་གྱིས་རབ་ཏུ་གང་བ་རྣམས། །ཞེས་ཕྱི་ནང་སྦྱར་བའི་ཕྱི་རོལ་གྱི་འགྲོ་བའི་ལས་སྣང་གིས་རི་རབ་དབྱིབས་ཚུལ་མངོན་པ་དང་དུས་ཀྱི་འཁོར་ལོ་ཐ་དད་པའི་ལུགས་ཕྱི་མ་ལྟར་རྡོ་རྗེའི་རྭའི་འོག་ན་ཡོད་པའི་གླིང་དྲུག་ནི་ལོངས་སྤྱོད་ཀྱི་ས་དང་དེའི་ཕྱི་རོལ་གླིང་བཞི་གླིང་ཕྲན་བརྒྱད་ལ་བདུན་པ་ལས་ཀྱི་ས་ཞེས་བཤད་ཅིང༌། ཛ་ན་སྐྱེ་བ་ལའོ་ཞེས་པའི་བྱིངས་བཞག །ནའི་ཨ་བརྗོད་དོན་ཡིན་པས་ཕྱིས། བུཀ྄་རྐྱེན་དུ་བྱིན། ཀ་ལ་ཡན་བཞིན་ཡང་སྟེ་ཡ་ལ་བརྗོད་པ་བོར་བའོ་ཞེས་ཀ་ཕྱིས། རྣམ་དབྱེ་དང་པོའི་གཅིག་ཚིག་སི་བྱིན། མི་ཟད་པ་ལ་སི་དབྱིའོ་ཞེས་སི་ཕྱིས། དེའི་སྡེ་པ་ལ་སྡེ་པའི་མཐའ་འོས། ན་མ་རུ་བསྒྱུར། གསལ་བྱེད་དབྱངས་མེད་པ་ཕ་རོལ་གྱི་ཡི་གེར་དྲང་ངོ༌། །ཞེས་བསྒྲུབས་པས་ཛམྦུ་ནི་ལུས་ཅན་སྐྱེ་བའི་གནས་ཡིན་ལ། བྱེ་བྲག་འཛམ་གླིང་ཆུང་ངུ་ནི་བདེ་མཆོག་མཁའ་འགྲོ་རྒྱ་མཚོའི་རྒྱུད་ཀྱི་ལེའུ་དང་པོ་ལས། འཛམ་བུ་གླིང་ནི་ཆེན་པོ་ཡི། །དུམ་བུ་བཅུ་གཉིས་ཀྱི་ནི་དབུས། །ཞེས་པའི་ལྷོ་ཕྱོགས་ཛམྦུ་ཏྲི་ཤས་མཚན་པའི་གླིང་འདི་ཉིད་ཀྱི་ལྟེ་བ་མ་དྷྱ་ག་ཏ་དྷ་ར། ཙནྡྲ་པར་པྲྀ་ཥོ་དྷ་ར་ལ་སོགས་པ་རྣམས་སོས། བསྡུ་བ་བྱས་པས་མ་ག་དྷ་སྟེ་དབུས་འགྱུར་འཆང་ཞེས་དུས་གསུམ་གྱི་བདེ་བར་གཤེགས་པ་རྣམས་མངོན་པར་རྫོགས་པར་འཚང་རྒྱ་བའི་རྟེན་ཡིན་པས་བསྐལ་མཐའི་དུས་ཀྱང་གཞོམ་གཞིག་མི་ནུས་པ་རྡོ་རྗེ་གདན་