[A:༤༠༤]རྣམས་ལ་གྲགས་པའི་ཡང་སྲིད་དང་ཐུགས་རྒྱུད་གཅིག་པ་རགས་རིམ་བརྗོད་ན། ཐམས་ཅད་མཁྱེན་པ་མཁྱེན་བརྩེའི་དབང་ཕྱུག་གིས་མཛད་པའི་བསྟོད་པ་བཀྲ་ཤིས་མཚན་བཟང་མར། མགོན་ཁྱོད་གདོད་མའི་དབྱིངས་སུ་སངས་རྒྱས་ཀྱང༌། །གྲངས་མེད་གདུལ་བྱའི་ཁམས་དང་བསམ་པ་བཞིན། །ངོ་མཚར་སྐྱེ་བའི་ཟློས་གར་བཅུ་གསུམ་གྱིས། །ཕན་བདེའི་དགའ་སྟོན་སྤེལ་ལ་གསོལ་བ་འདེབས། །ཞེས་དང༌། འདར་པ་རིན་ཅེན་དཔལ་བཟང་གིས་མཛད་པའི་ཚིགས་བཅད་མར། བདེ་ཆེན་འཁོར་ལོའི་མགོན་པོ་ཧེ་རུ་ཀཿ །བློ་འདས་འོད་གསལ་དགའ་མས་འཁྱུད་པའི་དཔལ། །དཀྱིལ་འཁོར་རྒྱ་མཚོའི་རིགས་བདག་རྡོ་རྗེ་འཛིན། །ཁྱབ་བདག་བླ་མའི་ཞབས་ལ་གསོལ་བ་འདེབས། །མགོན་ཁྱོད་འོག་མིན་ཆེན་པོའི་ཞིང་ཁམས་སུ། །སྐུ་གསུམ་ཡན་ལག་བདུན་ལྡན་མངོན་གྱུར་ཀྱང༌། །ཞིང་འདིར་སྐལ་བཟང་འགྲོ་རྣམས་བསྒྲལ་བའི་སླད། །བགྲང་ཡས་རྣམ་འཕྲུལ་བསྟན་ལ་གསོལ་བ་འདེབས། །འཕགས་ཡུལ་ཨཽཌྜི་ཡ་ནའི་ནོར་འཛིན་མར། །མཁའ་སྤྱོད་དབང་མོས་རྗེས་བཟུང་སྠ་ཝི་ར། །བརྟུལ་ཞུགས་སྤྱོད་པས་གདུག་ཅན་ཀུན་སྒྲོལ་བའི། །རྣལ་འབྱོར་དབང་པོར་བསྟན་ལ་གསོལ་བ་འདེབས། །གངས་ཅན་ལྗོངས་འདིར་སངས་རྒྱས་སྟོན་པ་དང༌། །ཆོས་སྐུ་འོད་ཟེར་མཚུངས་མེད་བུ་སྟོན་རྗེ། །ཡར་ཀླུངས་པ་དང་དགེ་སློང་དབང་མོ་སོགས། །མཁས་གྲུབ་བརྒྱུད་མར་བལྟམས་ལ་གསོལ་བ་འདེབས། །ཞེས་པ་འདིའི་དངོས་བསྟན་ལ་བདུན་ལས་མ་བྱུང་ཡང་བཀྲ་ཤིས་མཚན་བཟང་མར་བཅུ་གསུམ་བྱུང་བ་སྨོས་ན་དཔལ་ལྡན་རྒྱུད་ཀྱི་ཡེ་ཤེས་ལེའུར། དབྱིབས་ཀྱི་རླུང་ནི་ཆེན་པོ་ཐམས་ཅད་དག་གིས་སངས་རྒྱས་ཞིང་རྣམས་མཐའ་དག་རྣམ་པར་འགོད་པར་བྱེད། །