[A:༤༠༦]ལྟེ་བར་བྱས་པའི་ཕྱི་རོལ་ཏུ། ལུང་ལས། མཉན་ཡོད་གནས་བཅས་ཙམ་པ་ཀ །ཝ་ར་ཎཱ་སི་ཡངས་པ་ཅན། །རྒྱལ་པོའི་ཁབ་དང་དྲུག་པོ་ནི། །དེ་དག་གྲོང་ཁྱེར་ཆེན་པོར་གྲགས། །ཞེས་འཕགས་ཡུལ་ན་ཡོངས་སུ་གྲགས་པའི་གྲོང་ཁྱེར་ཆེན་པོ་དྲུག་དང་གཞན་ཡང་ཤར་ཕྱོགས་རྒྱ་ནག་པོའི་རྒྱལ་ཁམས་ན་འཕགས་པ་འཇམ་དཔལ་གྱིས་རྩིས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་པའི་གནས་རི་བོ་རྩེ་ལྔ། ལྷོ་ཕྱོགས་སུ་དཔལ་ལྡན་འབྲས་སྤུངས་ཀྱི་མཆོད་རྟེན་ན་དུས་ཀྱི་འཁོར་ལོའི་ཡེ་ཤེས་སེམས་དཔའ་མ་བསྡུས་པར་དངོས་སུ་བཞུགས་པ་སྐུ་གསུང་ཐུགས་ཀྱི་དཀྱིལ་འཁོར་ཡོངས་རྫོགས། དེའི་ལྷོ་ཕྱོགས་རྒྱ་མཚོའི་འགྲམ་ན་རི་བོ་པོ་ཏ་ལ་ཞེས་ཐུགས་རྗེ་ཆེན་པོ་སྤྱན་རས་གཟིགས་ཀྱི་གནས། ནུབ་ཕྱོགས་ན་ཨྱོན་མཁའ་འགྲོའི་གསང་མཛོད་ཧེ་རུ་ཀཿརང་བྱུང་གི་གཙུག་ལག་ཁང༌། བྱང་ཕྱོགས་ན་ཆོས་རྒྱལ་རིགས་ལྡན་རིམ་པར་བྱོན་ནས་འགྲོ་བ་རྣམས་ཕྱི་ནང་གཞན་གསུམ་གྱི་སྒོ་ནས་བཀྲི་བར་མཛད་པའི་གནས་ཤམྦྷ་ལ། དེར་མ་ཟད་ཀྱེ་རྡོར་བདེ་མཆོག་སམྤུ་ཊི་མཁའ་འགྲོ་རྒྱ་མཚོ་སོགས་ལས་འཛམ་བུ་གླིང་དབུས་མ་འདི་ཉིད་རང་ན་ཡུལ་ཉེར་བཞི་དང་དུར་ཁྲོད་བརྒྱད་སོགས་གནས་སུམ་ཅུ་རྩ་གཉིས་ཡོད་པར་བཤད་ཅིང༌། རྨ་བྱ་ཆེན་མོ་ལས། ཡུལ་འཁོར་ལྔ་བརྒྱ། ལྗོངས་ཆེན་པོ་བཅུ་དྲུག །ཡུལ་ཕྲན་སྟོང༌། གཞན་ཡང་མི་རིགས་མི་གཅིག་པ་སུམ་བརྒྱ་དང་དྲུག་ཅུ་སྐད་རིགས་བདུན་བརྒྱ་ཉི་ཤུ་སོགས་མཐའ་ཀླས་པའི་ནང་ཚན་རྒྱ་བོད་གཉིས་སུ་སྐུའི་སྤྲུལ་པ་རགས་པ་ཙམ་བཤད་པ་བཅུ་གསུམ་ལས།། ༈ དང་པོ་རྣལ་འབྱོར་དབང་ཕྱུག་ནི། ཐམས་ཅད་མཁྱེན་པ་མཁྱེན་བརྩེའི་ཞབས་ཀྱི་གསང་བའི་རྣམ་ཐར་ལས། ནུབ་