[A:404]rnams la grags pa'i yang srid dang thugs rgyud gcig pa rags rim brjod na/ thams cad mkhyen pa mkhyen brtse'i dbang phyug gis mdzad pa'i bstod pa bkra shis mtshan bzang mar/ mgon khyod gdod ma'i dbyings su sangs rgyas kyang / /grangs med gdul bya'i khams dang bsam pa bzhin/ /ngo mtshar skye ba'i zlos gar bcu gsum gyis/ /phan bde'i dga' ston spel la gsol ba 'debs/ /zhes dang / 'dar pa rin cen dpal bzang gis mdzad pa'i tshigs bcad mar/ bde chen 'khor lo'i mgon po he ru kaH /blo 'das 'od gsal dga' mas 'khyud pa'i dpal/ /dkyil 'khor rgya mtsho'i rigs bdag rdo rje 'dzin/ /khyab bdag bla ma'i zhabs la gsol ba 'debs/ /mgon khyod 'og min chen po'i zhing khams su/ /sku gsum yan lag bdun ldan mngon gyur kyang / /zhing 'dir skal bzang 'gro rnams bsgral ba'i slad/ /bgrang yas rnam 'phrul bstan la gsol ba 'debs/ /'phags yul auDDi ya na'i nor 'dzin mar/ /mkha' spyod dbang mos rjes bzung stha wi ra/ /brtul zhugs spyod pas gdug can kun sgrol ba'i/ /rnal 'byor dbang por bstan la gsol ba 'debs/ /gangs can ljongs 'dir sangs rgyas ston pa dang / /chos sku 'od zer mtshungs med bu ston rje/ /yar klungs pa dang dge slong dbang mo sogs/ /mkhas grub brgyud mar bltams la gsol ba 'debs/ /zhes pa 'di'i dngos bstan la bdun las ma byung yang bkra shis mtshan bzang mar bcu gsum byung ba smos na dpal ldan rgyud kyi ye shes le'ur/ dbyibs kyi rlung ni chen po thams cad dag gis sangs rgyas zhing rnams mtha' dag rnam par 'god par byed/ /