[A:༤༠༣]དམན་པ་དག་ཀྱང་བསྔགས་འོས་ལ་འགོད་མཐུ་ཆེན་རྣམས་ཀྱི་བྱེད་པའི་ཕུལ། །མ་ལ་ཡར་ཉེ་ཕལ་གྱི་ཤིང་ཡང་རྐང་འཐུང་བཟང་པོའི་དྲི་བསུང་ངད༌། །འཆང་བར་བྱེད་པའི་ནུས་པ་རབ་མཐོ་ཙནྡན་དེ་དག་རྒྱལ་གྱུར་ཅིག །ཅེས་ལྷོ་ཕྱོགས་མ་ལ་ཡའི་ནགས་ཀླུང་དུ་སྐྱེས་པའི་ཤིང་ཕལ་པ་དག་ཀྱང་འཇམ་མགོན་ས་སྐྱ་པཎྜི་ཏས། མ་ལ་ཡ་ལས་འོངས་པ་ཡི། །སྡོང་དུམ་ཕལ་ལ་རིན་ཐང་བརྩི། །ཞེས་ཙནྡན་གྱི་དྲི་བསུང་ལན་ཅིག་མ་ཡིན་པར་སིམ་པའི་ནུས་པས་ལྗོན་པ་ཕལ་པ་ལའང་ཙནྡན་དང་ཕྱོགས་འདྲའི་དྲི་ནུས་འབྱུང་བ་ལྟར་མཁས་དང་གྲུབ་པའི་ཡོན་ཏན་ཡང་ནས་ཡང་དུ་བརྗོད་ཅིང་བསམས་ན་རང་ཅག་བློ་དང་སྤྱོད་ཚུལ་ཆེས་ཆེར་དམན་པ་རྣམས་ཀྱང་བྱ་བ་ངན་པ་ལས་ལྡོག་ཅིང་སྐྱེད་ཐོན་ནས་དམ་པའི་རྣམ་ཐར་ལ་རིམ་གྱིས་འཇུག་པ་སོགས་དགོས་པ་ལྷག་པར་ཆེ་ཞིང་རང་གི་ལེགས་བྱས་ཀྱི་ཕུང་པོ་བླ་ནས་བླར་འཕེལ་བའི་ཚོགས་རྒྱ་ཆེར་གསོག་པའི་ཕྱིར་དུས་གསུམ་གྱི་བདེ་བར་གཤེགས་པ་མ་ལུས་པའི་གསང་བ་རབ་འབྱམས་མི་ཟད་པ་རྒྱན་གྱི་འཁོར་ལོའི་བང་མཛོད་གདན་གསུམ་ཚང་བའི་ཁྱབ་བདག་དགྱེས་མཛད་རྡོ་རྗེ་བཤེས་གཉེན་དམ་པའི་སྒྱུ་འཕྲུལ་དྲ་བའི་རོལ་པ་ཚར་ཆེན་ཆོས་ཀྱི་རྒྱལ་པོའི་རྣམ་པར་ཐར་པའི་རིམ་པ་ལ། མདོ་སྡེ་རྒྱན་ལས། སྐྱེ་བ་སྐྱེད་མོས་ཚལ་འགྲོ་ལྟར་རྟོགས་ནས། །སྤྲོ་བའི་སེམས་དྲངས་དགའ་ཞིང་དེ་ལ་འཇུག །ཅེས་རྒྱལ་སྲས་འཕགས་པ་སེམས་ཅན་གྱི་དོན་དུ་བསམས་བཞིན་སྲིད་པར་སྐྱེ་བ་ལེན་པ་ལ་ངང་པ་པད་མཚོར་འཇུག་པ་ལྟར་སྤྲོ་ཞིང་སྤྲུལ་པ་བྱེ་བ་ཐེར་འབུམ་དུས་གཅིག་ཏུ་སྟོན་པས་འདི་ལྟ་བུའོ་ཞེས་ལྕེ་བརྒྱས་བསྐལ་པར་བརྗོད་ཀྱང་ཟད་པའི་མཐའ་ག་ལ་ཞིག །འོན་ཏེ་ཐུན་མོང་གི་གདུལ་བྱ་