[A:༤༦༠]བ་ལ་བསྟོད་པ་ལས། །རྒྱལ་བ་སྟོན་པ་དེ་ཡི་བསྟན་པ་དག །མདོ་དང་ཆོས་མངོན་ཡིན་གསུང་འདུལ་བ་ནི། །བསྟན་དང་སྟོན་པ་དངོས་ཡིན་དེ་ཡི་ཕྱིར། །ཉིས་འགྱུར་ཕྱག་བྱ་འདུལ་ལ་ཕྱག་བྱོས་ཤིག །ཅེས་མདོ་མངོན་གཉིས་ཀྱིས་བསྟན་པའི་གོ་ཆོད་ཀྱང་སྟོན་པའི་གོ་མི་ཆོད། འདུལ་བས་གཉིས་ཀའི་གོ་ཆོད་པ་དང༌། ཐམས་ཅད་མཁྱེན་པ་ཡེ་བཟང་རྩེ་བས། དེ་ལྟར་བོད་ཡུལ་འདིར་འདུལ་བའི་བསྟན་པ་ལ་འཕེལ་འགྲིབ་ཆེར་བྱུང་མོད་ཀྱི་ཐེག་པ་ཆེན་པོ་གསང་སྔགས་ཀྱི་བསྟན་པ་ནི་དེང་སང་གི་བར་དུ་ནུབ་མ་མྱོང་ཞེས་དར་མས་བསྟན་པ་བསྣུབས་པར་གྲགས་པའང་འདུལ་བ་ལ་དགོངས་ཤིང༌། གང་དུ་ཆོ་ག་མ་ཉམས་པ་དང་དེ་ལ་བརྟེན་ནས་སྡོམ་པ་ལེན་པ། གཞི་གསུམ་གྱི་བྱ་བ་སོགས་ཡོད་པ་དེར་བསྟན་པ་ཡོད་པར་གསུངས་པས། རྗེ་འདི་ཉིད་ཐུབ་པའི་བསྟན་པ་རིན་པོ་ཆེའི་སྒོར་འཇུག་པར་བཞེད་དེ། ན་ཚོད་ལྡན་ཞེས་པ་ཤིང་མོ་ཕག་གི་ལོ་རྒྱལ་པོ་ལོ་གསར་པའི་དགུང་ལོ་བཅུ་བཞིར་ཕེབས་པའི་དུས་འཛིམ་ཆོས་ལུང་གི་གཙུག་ལག་ཁང་དུ་ཡོངས་འཛིན་དམ་པ་བློ་གྲོས་རྒྱལ་མཚན་པའི་དྲུང་དུ་ཚངས་པར་སྤྱོད་པ་དགེ་བསྙེན་གྱི་སྡོམ་པ་གསན། རྩ་བ་དང་ཡན་ལག་གི་བསླབ་བྱ་མཐའ་དག་ལེགས་པར་བསླབས་ཏེ་བག་ཡོད་པའི་གནས་ཁོ་ན་ལྷུར་བླངས། དེ་ནས་དབང་ཕྱུག་ཅེས་པ་མེ་མོ་གླང་གི་ལོར་བཀའ་གདམས་གླེགས་བམ་གྱི་མ་འོངས་ལུང་བསྟན་ལས། ཆོས་དགེ་བ་བཅུ་ཡིས་ཁྱད་འཕགས་པ། །གླིང་ཕུན་སུམ་ཚོགས་པ་འཛམ་བུའི་གླིང༌། །སྒོས་ཉང་ཤབ་ས་ཡི་ལྟེ་བ་སྟེ། །ས་དེ་ཡི་ནང་ནས་ཁྱད་འཕགས་པ། །མཐོ་བཀྲ་ཤིས་