[A:༤༥༩]ལོ་ཆེན་ཁོ་རང་ཡིན་ཚོད་དུ་གདའ། །ཞེས་གསུངས་པ་སྐུ་སྐྱེ་སྔོན་མ་དགེ་སློང་དབང་མོས་སྟག་ཚང་ལོ་ཆེན་གྱི་ཞབས་ལ་ཐུག་ཅིང༌། ཀུན་སྤངས་ཆེན་པོའི་དངོས་ཀྱི་བཤེས་གཉེན་ཡིན་པས་བླ་མའི་བླ་མར་སོང་བ་དང་ལོ་ཆེན་ནས་བརྒྱུད་པའི་མ་ཏི་ལུགས་ཀྱི་འཇམ་དཀར་རྗེ་བླ་མར་བཀའ་བབས་པ་འདི་གཞན་ལས་ཁྱད་ཞུགས་ཤིང་ཆོས་རྒྱུན་གཞན་མ་ཁ་ཤས་ཡོད་པར་མ་ཟད་ལེགས་བཤད་ཀྱི་བསྟན་བཅོས་མང་པོར་ཐུགས་གཙིགས་ཆེ་བ་དང༌། སྟག་ཚང་པའི་བསྟན་སྲུང་སྤྱི་བཤགས་བསྐང་བའི་སྐབས་མཛད་པ་སོགས་སྒོ་དུ་མ་ནས་འཇིག་རྟེན་གྱི་མིག་གཅིག་པུ་དེའི་འཕྲིན་ལས་སྤེལ་བའི་སྔོན་འགྲོའི་སྒོར་སྣང༌། དེ་དག་གི་དུས་དཔལ་རྟ་མགྲིན་ཞབས་བརྒྱད་པ་སོགས་ཡི་དམ་གྱི་ལྷ་དུ་མའི་རྣམ་པར་ཤར་ཞིང་བསྐྱེད་རྫོགས་ཀྱི་རྣལ་འབྱོར་ཟབ་མོ་ལས་བྱུང་བའི་ཕྱག་རྒྱ་ཆེན་པོ་མཚན་ཉིད་པ། སྡོམ་གསུམ་དུ། ངེད་ཀྱི་ཕྱག་རྒྱ་ཆེན་པོ་ནི། །དབང་ལས་བྱུང་བའི་ཡེ་ཤེས་དང༌། །རིམ་པ་གཉིས་ཀྱི་ཁྱད་པ་ལས། །བྱུང་བའི་རང་བྱུང་ཡེ་ཤེས་ཡིན། །ཞེས་པ་ལ་དབང་འབྱོར་པས། ཀུན་མཁྱེན་མཁྱེན་བརྩེས། གཞོན་ནུ་ཉིད་ནས་རང་ལུས་ལྷ་སྐུར་གཟིགས། །དམ་ཅན་སྲུང་མས་དངོས་སུ་གཏོར་མ་བླངས། །ཀློག་དང་ཡི་གེ་མ་བསླབས་མཁས་པར་མཁྱེན། །བྱིས་པའི་སྤྱོད་ལས་འདས་ལ་གསོལ་བ་འདེབས། །ཞེས་སོ། །གསོལ་འདེབས་ལས། ཆོས་ལུང་འཛིམ་གྱི་གཙུག་ལག་ཁང་ཆེན་དུ། །ཡོངས་འཛིན་ཞབས་བསྟེན་དགེ་བསྙེན་བརྟུལ་ཞུགས་ནོས། །ཐམས་ཅད་མཁྱེན་པ་དགེ་འདུན་རྒྱ་མཚོ་ལས། །དགེ་ཚུལ་སྡོམ་པ་བཞེས་ལ་གསོལ་བ་འདེབས། །ཞེས་འདུལ་