[A:460]ba la bstod pa las/ /rgyal ba ston pa de yi bstan pa dag /mdo dang chos mngon yin gsung 'dul ba ni/ /bstan dang ston pa dngos yin de yi phyir/ /nyis 'gyur phyag bya 'dul la phyag byos shig /ces mdo mngon gnyis kyis bstan pa'i go chod kyang ston pa'i go mi chod/ 'dul bas gnyis ka'i go chod pa dang / thams cad mkhyen pa ye bzang rtse bas/ de ltar bod yul 'dir 'dul ba'i bstan pa la 'phel 'grib cher byung mod kyi theg pa chen po gsang sngags kyi bstan pa ni deng sang gi bar du nub ma myong zhes dar mas bstan pa bsnubs par grags pa'ang 'dul ba la dgongs shing / gang du cho ga ma nyams pa dang de la brten nas sdom pa len pa/ gzhi gsum gyi bya ba sogs yod pa der bstan pa yod par gsungs pas/ rje 'di nyid thub pa'i bstan pa rin po che'i sgor 'jug par bzhed de/ na tshod ldan zhes pa shing mo phag gi lo rgyal po lo gsar pa'i dgung lo bcu bzhir phebs pa'i dus 'dzim chos lung gi gtsug lag khang du yongs 'dzin dam pa blo gros rgyal mtshan pa'i drung du tshangs par spyod pa dge bsnyen gyi sdom pa gsan/ rtsa ba dang yan lag gi bslab bya mtha' dag legs par bslabs te bag yod pa'i gnas kho na lhur blangs/ de nas dbang phyug ces pa me mo glang gi lor bka' gdams glegs bam gyi ma 'ongs lung bstan las/ chos dge ba bcu yis khyad 'phags pa/ /gling phun sum tshogs pa 'dzam bu'i gling / /sgos nyang shab sa yi lte ba ste/ /sa de yi nang nas khyad 'phags pa/ /mtho bkra shis