[A:༤༥༨]འགྱུར་སྟོན་ཅིང་ཐུགས་འཁྲིད་པའི་ཚུལ་དང་གཏོར་བསྔོས་མཛད་པའི་གཏོར་མ་དངོས་སུ་ལེན་པ་བྱུང་བ་མི་དམར་པོ་དེ་གནོད་སྦྱིན་བེག་ཙེ་དང༌། ཛོ་ཀི་གཉན་མགོན་ཞལ་བཞི་པ་ཡིན་ཚོད་དུ་སྣང༌། འདོད་ཁམས་དབང་ཕྱུག་མས་རྟགས་མཚན་ཁྱད་པར་ཅན་བསྟན་པ་ས་ལུགས་ལ་ལྕམ་དྲལ་སྦགས་སྒྲུབ་ཀྱི་རྗེས་གནང་ཙམ་ལས་མེད་ནའང་རྗེ་ཉིད་ཀྱིས་གཞུང་དུ་གསན་ནས་བླ་མའི་སྐུ་དགྲ་བསྒྲལ་བ་སོགས་ཀྱི་ལོ་རྒྱུས་བཞིན་འདི་དུས་ནས་ཆོས་སྐྱོང་གི་ལས་འབྲེལ་གཞན་དང་མི་འདྲ་བ་ཞིག་ཡོད་པར་མཆིས་ཤིང་དེར་མ་ཟད་ཆོས་སྐྱོང་ཆེ་ཆུང་ཐམས་ཅད་ཀྱི་བཀའ་བབས་པས་རོལ་མོ་འུར་ཆེམ་ཙམ་ལ་སྲུང་མ་བྲན་འཁོལ་དུ་མི་རློམ་པར་སྙན་བརྒྱུད་བཞིའི་རྟེན་འབྲེལ་གྱིས་ཚར་ལུགས་ཞེས་གྲུབ་མཐའ་འབུར་དོད་འདི་ཉིད་འབྱུང་བའི་སྔོན་འགྲོར་གོར་མ་ཆག །ཆོས་འཁོར་སྒང་པ་ལོ་ཆེན་ཤེས་རབ་རིན་ཅེན་ཡིན་ཟེར་བའི་པཎྜི་ཏ་ཞྭ་མོ་པད་འདབ་ཅན་གསོལ་བ་ཞིག་རིན་པོ་ཆེའི་ཁྲི་སེང་གེ་གཉིས་བསྣོལ་བས་བཏེག་པའི་སྟེང་དུ་བཞུགས་ནས་གཞོན་ནུ་ཞེས་བོས་ཏེ་ཁྱོད་དང་སྔོན་ནས་ལས་འབྲེལ་ཡོད་པའི་ལྷ་མཉྫུ་ཤྲཱི་དཀར་པོ་འདི་ཡིན་པས། དེའི་སྒོས་རྒྱུད་དང་སྒྲུབ་ཐབས་ཡིན་ཟེར་བའི་ལུང་མཛད། མཚན་བརྗོད་བཀླགས་རྗེས་སྒོས་རྒྱུད་མིན་གསུང་བའི་མོད་ཐུགས་ལ་ཐིམ་པའི་སྣང་བ་ཤར། དེ་ནས་བཟུང་ཕྱག་དཔེ་འཛིན་བཤར་སོགས་གང་ལའང་ཐོགས་པ་མེད་པའི་ཐུགས་རབ་ཤིན་ཏུ་ཡངས་པར་གྱུར་པས་ཕྱིས་བཀའ་ལས། དེ་དུས་གནང་བའི་སྒྲུབ་ཐབས་དེ་མ་ཏིས་མཛད་པའི་འདི་འདྲ་མོ་འདུག །རྒྱུད་དེ་མ་གོ་སྟེ་ལོ་ཙཱ་བ་དེ་ཉིད་ཀྱང་སྐྱེ་བ་སྔ་མའི་བླ་མ་ཞིག་ཡིན་པར་འདུག །