[A:459]lo chen kho rang yin tshod du gda'/ /zhes gsungs pa sku skye sngon ma dge slong dbang mos stag tshang lo chen gyi zhabs la thug cing / kun spangs chen po'i dngos kyi bshes gnyen yin pas bla ma'i bla mar song ba dang lo chen nas brgyud pa'i ma ti lugs kyi 'jam dkar rje bla mar bka' babs pa 'di gzhan las khyad zhugs shing chos rgyun gzhan ma kha shas yod par ma zad legs bshad kyi bstan bcos mang por thugs gtsigs che ba dang / stag tshang pa'i bstan srung spyi bshags bskang ba'i skabs mdzad pa sogs sgo du ma nas 'jig rten gyi mig gcig pu de'i 'phrin las spel ba'i sngon 'gro'i sgor snang / de dag gi dus dpal rta mgrin zhabs brgyad pa sogs yi dam gyi lha du ma'i rnam par shar zhing bskyed rdzogs kyi rnal 'byor zab mo las byung ba'i phyag rgya chen po mtshan nyid pa/ sdom gsum du/ nged kyi phyag rgya chen po ni/ /dbang las byung ba'i ye shes dang / /rim pa gnyis kyi khyad pa las/ /byung ba'i rang byung ye shes yin/ /zhes pa la dbang 'byor pas/ kun mkhyen mkhyen brtses/ gzhon nu nyid nas rang lus lha skur gzigs/ /dam can srung mas dngos su gtor ma blangs/ /klog dang yi ge ma bslabs mkhas par mkhyen/ /byis pa'i spyod las 'das la gsol ba 'debs/ /zhes so/ /gsol 'debs las/ chos lung 'dzim gyi gtsug lag khang chen du/ /yongs 'dzin zhabs bsten dge bsnyen brtul zhugs nos/ /thams cad mkhyen pa dge 'dun rgya mtsho las/ /dge tshul sdom pa bzhes la gsol ba 'debs/ /zhes 'dul