[A:༤༥༧]ཤེས་ཀྱིན་འདུག །ཡི་གེ་འདི་རྡོ་ལ་ཐོད་ལེ་ཀོར་གྱིས་བྲིས་ཤིང༌། དེ་རྗེས་ཉི་མ་གཅིག་གཉིས་བྲིས་པས་ཤེས་བྱུང་གསུང་པ་ཀུན་མཁྱེན་བུ་སྟོན་ཞབས་ཀྱི་རྣམ་ཐར་དུ་གསལ་བའི་བག་ཆགས་ཀྱི་ཀློང་རྡོལ་བར་སེམས། དེའི་ཚེ་ཕྱི་རོལ་ཏུ་བྱིས་པ་འགའ་དང་ལྷན་ཅིག་ཏུ་བྱོན་པ་ན་འབྱུང་པོ་མ་རུངས་པས་བརླམས་པའི་ཁྱི་ཞིག་གིས་ཕྱག་ཤུབས་ལ་འཆངས་པས་གཞན་རྣམས་བྲོས་རྗེ་ཉིད་ཐུགས་ཚད་པའི་རྐྱེན་གྱིས་ཧེ་རུ་ཀཿཞལ་བརྒྱད་པའི་རྣམ་པར་རང་བྱུང་གིས་ཤར་ནས་སྡིགས་མཛུབ་མཛད་པས་ཕ་ཚད་དུ་བྲོས། དེར་རྗེས་བྱིས་པ་གཞན་རྣམས་ཀྱིས་རོལ་མོ་དཀྲོལ་ཚུལ་དང་རྗེ་ཉིད་ཀྱིས་འཇིམ་པ་ལ་བཟོས་པའི་གཏོར་མ་ཞིག་སྐུ་རྩེད་ཀྱི་ཚུལ་དུ་འཕངས་པས་ཁྱི་དེའི་ཁ་ནས་ཁྲག་སྐྱུགས་ནས་ཤི །དགུང་ལོ་ལྔ་དྲུག་ཙམ་གྱི་ཚེ་ནུབ་ཅིག་ཡབ་ཀྱི་སྟག་ཞོན་གྱི་ཐུན་གཏོར་བསྔོས་པ་སྐྱེལ་དུ་བྱོན་པ་ན་མི་ནག་པོ་འཇིགས་སུ་རུང་བས་གཏོར་མ་དེ་དངོས་སུ་བླངས་སོང་དེ་ལ་འཇིགས་ནས་ཅུང་ཟད་བྲོས་ཏེ་ཕྱི་ལོག་མཛད་གཟིགས་པས་དེའི་འཁྲིས་ནའང་འཇིགས་སུ་རུང་བ་ཞིག་འདུག་པ་དེས་མཻ་ཏྲི་པས་ད་ཁྱོད་ལ་དངོས་སུ་གཏད་ཁྱོད་ཀྱིས་ཚུལ་བཞིན་བསྟེན་ངས་ཀྱང་མཆོག་ཐུན་གྱི་དངོས་གྲུབ་སྦྱིན་པ་ཡིན་པས་གཏོར་མ་རེ་མ་ཆགས་པར་བསླང་ཟེར། མར་བྱོན་ནས་ཡབ་ལ་ཞུས་པས་ངེད་རང་གི་ཆོས་སྐྱོང་ཡིན་གསུང་ཡང་སྔོན་མ་དེ་སྟག་ཞོན་དང་ཕྱི་མ་དེ་ཡེ་ཤེས་མགོན་པོ་ཕྱག་དྲུག་པར་ངེས་ཤིང་དེས་རྐྱེན་བྱས་ནས་མཁས་གྲུབ་ཁྱུང་པོར་འཁྲུངས་པ་ཐུགས་དྲན་གསོས་སྣང༌། སྐབས་འགར་མི་དམར་པོ་གཟི་བརྗིད་ཤིན་ཏུ་ཆེ་བ་དང་ཨཱ་ཙརྻའི་རྣམ་པ་ཅན་གྱིས་དགའ་བའི་རྣམ་