[A:458]'gyur ston cing thugs 'khrid pa'i tshul dang gtor bsngos mdzad pa'i gtor ma dngos su len pa byung ba mi dmar po de gnod sbyin beg tse dang / dzo ki gnyan mgon zhal bzhi pa yin tshod du snang / 'dod khams dbang phyug mas rtags mtshan khyad par can bstan pa sa lugs la lcam dral sbags sgrub kyi rjes gnang tsam las med na'ang rje nyid kyis gzhung du gsan nas bla ma'i sku dgra bsgral ba sogs kyi lo rgyus bzhin 'di dus nas chos skyong gi las 'brel gzhan dang mi 'dra ba zhig yod par mchis shing der ma zad chos skyong che chung thams cad kyi bka' babs pas rol mo 'ur chem tsam la srung ma bran 'khol du mi rlom par snyan brgyud bzhi'i rten 'brel gyis tshar lugs zhes grub mtha' 'bur dod 'di nyid 'byung ba'i sngon 'gror gor ma chag /chos 'khor sgang pa lo chen shes rab rin cen yin zer ba'i paNDi ta zhwa mo pad 'dab can gsol ba zhig rin po che'i khri seng ge gnyis bsnol bas bteg pa'i steng du bzhugs nas gzhon nu zhes bos te khyod dang sngon nas las 'brel yod pa'i lha manydzu shrI dkar po 'di yin pas/ de'i sgos rgyud dang sgrub thabs yin zer ba'i lung mdzad/ mtshan brjod bklags rjes sgos rgyud min gsung ba'i mod thugs la thim pa'i snang ba shar/ de nas bzung phyag dpe 'dzin bshar sogs gang la'ang thogs pa med pa'i thugs rab shin tu yangs par gyur pas phyis bka' las/ de dus gnang ba'i sgrub thabs de ma tis mdzad pa'i 'di 'dra mo 'dug /rgyud de ma go ste lo tsA ba de nyid kyang skye ba snga ma'i bla ma zhig yin par 'dug /