[A:403]dman pa dag kyang bsngags 'os la 'god mthu chen rnams kyi byed pa'i phul/ /ma la yar nye phal gyi shing yang rkang 'thung bzang po'i dri bsung ngad / /'chang bar byed pa'i nus pa rab mtho tsandan de dag rgyal gyur cig /ces lho phyogs ma la ya'i nags klung du skyes pa'i shing phal pa dag kyang 'jam mgon sa skya paNDi tas/ ma la ya las 'ongs pa yi/ /sdong dum phal la rin thang brtsi/ /zhes tsandan gyi dri bsung lan cig ma yin par sim pa'i nus pas ljon pa phal pa la'ang tsandan dang phyogs 'dra'i dri nus 'byung ba ltar mkhas dang grub pa'i yon tan yang nas yang du brjod cing bsams na rang cag blo dang spyod tshul ches cher dman pa rnams kyang bya ba ngan pa las ldog cing skyed thon nas dam pa'i rnam thar la rim gyis 'jug pa sogs dgos pa lhag par che zhing rang gi legs byas kyi phung po bla nas blar 'phel ba'i tshogs rgya cher gsog pa'i phyir dus gsum gyi bde bar gshegs pa ma lus pa'i gsang ba rab 'byams mi zad pa rgyan gyi 'khor lo'i bang mdzod gdan gsum tshang ba'i khyab bdag dgyes mdzad rdo rje bshes gnyen dam pa'i sgyu 'phrul dra ba'i rol pa tshar chen chos kyi rgyal po'i rnam par thar pa'i rim pa la/ mdo sde rgyan las/ skye ba skyed mos tshal 'gro ltar rtogs nas/ /spro ba'i sems drangs dga' zhing de la 'jug /ces rgyal sras 'phags pa sems can gyi don du bsams bzhin srid par skye ba len pa la ngang pa pad mtshor 'jug pa ltar spro zhing sprul pa bye ba ther 'bum dus gcig tu ston pas 'di lta bu'o zhes lce brgyas bskal par brjod kyang zad pa'i mtha' ga la zhig /'on te thun mong gi gdul bya