[A:༤༠༢]བཏགས་རྫུན་གྱི་རྣམ་པར་ཐར། །མཐོང་ན་དམ་པའི་སྤྱོད་ཚུལ་ལྷུག་པ་རུ། །སྨྲ་བ་སྔོན་བསགས་ལེགས་བྱས་བྱེ་བས་ཉོས། །ཀུ་ཤའི་རྩེ་མོས་འཐོར་ཏེ་རྒྱ་མཚོའི་མཐའ། །འཛད་བྱེད་དཀའ་ཐུབ་བསྟེན་པའི་རྗེས་འགྲོ་བ། །ཕྲ་མོའི་བློ་གྲོས་ཁབ་ཀྱི་མིག་བུ་རུ། །ཁྱོད་ཡོན་ལྷུན་པོ་འཛུད་པའི་གོ་སྐབས་ཅི། །འོན་ཏེ་རིན་ཆེན་གླིང་ནས་ནོར་བུའི་ཚོགས། །དེད་དཔོན་གཅིག་གིས་འདྲེན་པར་མི་བཟོད་ཀྱང༌། །རང་གིས་ཇི་ཙམ་འཁུར་ནུས་བདོག་པ་ཡིས། །དབུལ་བའི་གདུང་སེལ་འདོད་འཇོ་དངོས་པོའི་གཤིས། །འཁྱོག་ཚིག་ཆགས་པའི་གདོང་པ་རིག་བྱེད་སྒོར། །སྤྲུལ་པའི་ཟོལ་སྦྱོར་རྒན་པོ་མ་ཡིན་པའི། །མཁས་གྲུབ་ངང་ཚུལ་གསེར་སྒོང་ཡོངས་སྨིན་པ། །སྔོན་མེད་ཚངས་པར་ལྟ་ལ་ལྷ་རྣམས་བྲེལ། །ཕྱོགས་འཛིན་གདོན་གྱིས་ཕྲག་དོག་སྦྱིན་སྐྱེས་མགོར། །མཐུ་སྟོབས་རྡོ་རྗེ་རྩེ་བརྒྱ་རབ་བསྣུན་ཀྱང༌། །རིས་མེད་འགྲོ་ལ་བརྩེ་བའི་སྤྱན་སྟོང་དཀྱུས༌། །རིང་པོར་སྐྱོང་བའི་བཤེས་གཉེན་འཆི་མེད་གཙོ། །རླབས་ཆེན་མཛད་པ་སོས་ཀྱི་དགའ་སྟོན་དུས། །འདྲེན་བྱེད་ཚིག་སྦྱོར་དཔྱིད་ཀྱི་ལང་ཚོ་མ། །སྤེལ་ལེགས་ཟློས་གར་འཕྲེང་མཛེས་གསོང་པོའི་གླུ། །གཟུར་གནས་གཞན་གསོས་མགྲིན་ནས་ལེན་འདི་ཉོན། །དེ་ཡང་སློབ་དཔོན་དཎྜིས། ཤིས་བརྗོད་ཕྱག་བྱ་དངོས་པོ་ནི། །ངེས་པར་བསྟན་པའང་དེ་ཡི་སྒོ། །ཞེས་ཐོག་མར་ཤིས་བརྗོད། ཕྱག་བྱ། དངོས་པོ་ངེས་བསྟན་རྣམས་སུམ་ལྡན། གཉིས་ལྡན་སོགས་ཅི་རིགས་པ་བཤད་པའི་ད་ལམ་ཕྱི་མའི་སྒོ་ནས་ཚིགས་སུ་བཅད་པ་སྔོན་དུ་སོང་བས་སྐབས་སུ་གླེང་བར་བྱ་བ་ནི། ཇི་སྐད་དུ། མཆོག་གི་ཁྱད་པར་ཉིད་ལ་རེག་ན་དེ་ཡི་ཡོན་ཏན་ཆ་ཤས་ཀྱིས། །