[A:༤༥༦]འདོད་ཁམས་དབང་མོ་ཡིས། །འཕྲིན་ལས་མ་ལུས་སྒྲུབ་ལ་གསོལ་བ་འདེབས། །རིན་ཅེན་སེང་གེའི་ཁྲི་ལ་འཁོད་པ་ཡི། །ཡོངས་འཛིན་སྐད་གཉིས་སྨྲ་བའི་དབང་པོ་དེའི། །ལྷག་པའི་ལྷ་ཡི་སྒྲུབ་ཐབས་ཞལ་ལུང་གིས། །ཤེས་རབ་སྣང་བ་རྒྱས་ལ་གསོལ་བ་འདེབས། ཞེས་དགུང་ལོ་གསུམ་ཙམ་གྱི་དུས་ཕྱི་རོལ་དུ་ཕེབས་པ་ན་ས་གཞི་ཐམས་ཅད་བདག་ཅག་གི་སྟོན་པའི་སྐུ་གསེར་སྦྱངས་ཞུན་མ་ལ་ཉི་འོད་ཕོག་པ་ལྟ་བུས་གང་བ་གཟིགས་པས་ཞབས་གོམ་འདེགས་འཇོག་མི་ནུས་པའི་སྣང་བ་དང༌། ཡང་སྐབས་ཤིག་མི་ལུས་དུད་འགྲོའི་མགོ་བརྙན་ཅན་འཇིགས་སུ་རུང་བ་མང་པོས་མི་གསོན་པོ་བཙོ་སྲེག་བྱེད་པ་གཟིགས་པའི་མོད་ལ་རང་ཉིད་ལ་འཕོས་པ་ལྟ་བུའི་སྡུག་བསྔལ་བྱུང་བ་ལས་སྒྲིབ་ཀྱི་ཆ་ཤས་ཅུང་ཟད་ཙམ་ལུས་པ་གནས་སྦྱོང་གི་ཉམས་ཀྱི་སྒོ་ནས་སྦྱངས་པའི་གསུང་རྒྱུན་སྣང་བ་ལམ་འབྲས་པའི་ལུགས་ལ་གནས་སྦྱོང་གི་ཉམས་འདི་འདྲ་ཤར་ན་ཕྱིན་ཆད་གནས་ངན་དེ་ལེན་མི་དགོས་པར་འཆད་པས་རྟགས་བཟང་པོ་ཡིན་མོད་འོན་ཏེ་རྣལ་འབྱོར་དབང་ཕྱུག་གི་སྤྲུལ་པ་ལ་དེ་འདྲར་ལྟོས་པ་མིན་ཀྱང་ཐུན་མོང་བའི་ངོར་དེ་བཞིན་གཤེགས་པའི་ཞབས་ལ་སེང་ལྡེང་གི་ཚལ་པ་སོར་བཅུ་དྲུག་པ་ཟུག་པ་སོགས་ལས་བཅུ་སྤྱད་པའི་སྐབས་དང་རྗེས་སུ་མཐུན་པར་མངོན། ཡབ་ཀྱི་ཕྱག་དཔེ་རྡོ་རྗེ་གཅོད་པ་དེ་གཟིགས་པ་ན་སྔོན་ཆད་འདྲི་ཀློག་ཙམ་མཛད་མ་མྱོང་ཡང་འདི་འདྲ་ཞིག་ཟེར་རྒྱུ་ཡིན་པ་འདུག་དགོངས་ཏེ་ཐོགས་མེད་དུ་ཀློག་པ་དང་འདྲི་བའང་སློབ་དཔོན་བསྟེན་པའི་རྩོལ་བ་ལ་མ་ལྟོས་པར་ཤུགས་བྱུང་གིས་མཁྱེན་པས། བཀའ་ལས། ཀློག་མི་དྲན་གོང་ནས་