[A:༦༢༩]འདོན་ལུང་བསྟན་གནང་བ་སོགས་མང༌། རྗེ་བོད་མཁར་བའི་རྣམ་ཐར་དུ། རྨི་ལམ་ལ་ཚར་ཆེན་རྡོ་རྗེ་འཆང་ཆེན་པོ་དེ་ཉིད་ན་བཟའ་སོགས་ཤིན་ཏུ་བཟང་བ་སྐུ་ལ་འོད་འཕྲོ་བ་དང་བཅས་ཕྱོགས་ཤིག་ལ་ཐེགས་སོང་བ་དང་རྗེའི་དྲུང་ལ་ལྟོས་པ་རྣམས་ངས་རྗེས་སུ་འཛིན་ནོ་གསུངས་སྤྱན་ཅེར་བ་ཞིག་གཟིགས་པ་རྨིས། དེ་ནས་རིང་པོར་མ་ལོན་པར་ཕ་བླ་མ་རྡོ་རྗེ་འཆང་ཆེན་པོ་དེ་ཉིད་དགོངས་པ་ཆོས་ཀྱི་དབྱིངས་སུ་ཐིམ་ཟེར་བའི་སྐད་ཅ་བྱུང་བ་ཡུག་ཅིག་འདི་བྱ་དང་འདི་བྱེད་མེད་པའི་ངང་ལ་འདི་རྨི་ལམ་ཡིན་ལས་ཆེ་བསམ་པ་དང༌། དེ་ལས་སད་དེ་ཀྱེ་མ་ཀྱེ་ཧུད་ཤིན་ཏུ་འཇིགས་སུ་རུང་བའི་འཁོར་བའི་རྒྱ་མཚོ་ལས་སྒྲོལ་བར་བྱེད་པའི་དེད་དཔོན་ཆེན་པོ་ལན་ཅིག་རྙེད་པ་དེ་ཉིད། རྨི་ལམ་སྒྱུ་མ་བཞིན་དུ་ཡལ་ནས་ཐལ་ད་མགོན་མེད་པའི་བདག་སོགས་འགྲོ་བ་རྣམས་ཇི་ལྟར་བྱེད་བསམས་པ་དང༌། མིག་མཆི་མས་གང་སེམས་ལ་བཟོད་གླགས་མེད་པའི་སྡུག་བསྔལ་དཔག་ཏུ་མེད་པ་བྱུང༌། སླར་བསམ་བློ་ལ་སྔོན་ཡང་དག་པར་རྫོགས་པའི་སངས་རྒྱས་ནས་བཟུང་བླ་མ་གོང་མ་ཚང་མས་མྱ་ངན་ལས་འདས་པའི་ཚུལ་བསྟན་ཁོང་རྣམས་བདེ་བ་ནས་བདེ་བའི་ཞིང་དུ་གཤེགས་པས་ཁམ་ཆེ། སྙན་བརྒྱུད་ཀྱི་གདམས་པ་རྣམས་ནི་ཐོབ་རང་རེ་ཆོས་གཤའ་མ་ཞིག་བྱེད་དགོས། ད་དུང་གནས་གསར་ནས་རྗེ་དྲུང་རིན་པོ་ཆེ་ལྟ་བུ་ཡང་བཞུགས་བསམས་པ་དང་འཇིག་རྟེན་ཕྱོགས་ནས་ངེད་རང་ཚོའི་བྱུང་ཚུལ་ཀྱང་དྲན་སྔོན་ནས་བསམས་པའི་གནས་དེ་ལྟ་བུ་ཞིག་ཏུ་ཐུགས་དམ་བྱེད་པ་ལས་གཞན་ཐབས་མེད་བསམ་པ་ཤར་ཞེས་བྱུང་བ། རང་སེམས་བླ་མའི་ངོ་བོར་ཐག་ཆོད་པའི་སྐྱེས་བུ་དེ་འདྲ་ལའང༌། དེ་བཞིན་གཤེགས་པའི་སྔོན་རོལ་ཏུ་མཆོག་ཟུང་ཉིད་ཞིང་ཁམས་