[A:༦༢༨]སྔར་འབབ་པ་ལྷན་ཅིག་བྱུང༌། བསམས་ཙ་ན་ང་རང་སྐལ་བ་བཟང་སྙམ་པའི་བློ་བདེ་ཕུགས་སུ་ཆུད་ལྟོས་བཅས་ཀུན་ཀྱང་ལུགས་གཉིས་བྱ་བ་ཕྲ་རགས་གང་ལའང་གེགས་ཀྱི་མཚན་མ་མི་འབྱུང་བ་ཞིག་ལགས་ཞེས་དང༌། དེ་ཉིད་ལས། འདར་དུ་སྐྱེ་བདུན་རིལ་སྒྲུབ་སྐབས་ཞག་ལྔ་སོང་བའི་སྔ་ཐུན་གྱི་བར་ལ་གཉིད་ཀྱི་རྣམ་པ་ཐུང་ཙམ་བྱུང་བའི་རྨི་ལམ་ན་རྗེ་བཙུན་སྤྲུལ་སྐུ་ཆེན་པོ་པདྨ་རྒྱལ་པོའི་སྐུ་ཉིད་མྱུག་རྒྱལ་ཁང་དུ་སྐྱེས་བདུན་སྒྲུབ་པའི་སྐབས་ཀྱི་སྐུའི་མདངས་ཇི་ལྟ་བ་དང་གཡས་ན་འཁྲུལ་ཞིག་ཆོས་སྐྱོང་བསོད་ནམས་ཡིན་ཟེར་བའི་སྐུ་གཟི་བརྗིད་ཆེ་བ་ཞིག་དང༌། གཡོན་ན་ཚར་ཆེན་ཡབ་སྲས་དང་བཅས་དགྱེས་པའི་ཞལ་འཛུམ་གྱི་མདངས་གསལ་ལེ་བ་བྱས་པ་ཞིག་རྨིས་པ། གཉིད་དངས་པ་ན་ཨེ་མ་ཧོ་ང་ཡང་བསོད་ནམས་ཆེ། དེ་ལྟ་བུའི་སླུ་མེད་ཀྱི་བླ་མ་རྣམས་དང་མཇལ་སྙམ་པ་དང༌། ད་སྙིང་པོ་བདག་དང་བདག་ལ་ལྟོས་པ་ཐམས་ཅད་ཨྱོན་བླ་མའི་དྲུང་དུ་སྐྱེ་ངེས་ཀྱི་སྨོན་པ་ཡིད་ཆེས་ངེས་ཤིག་བཏབ། ཅེས་དང༌། རྡོ་རྗེ་འཆང་དབང་ཕྱུག་རབ་བརྟན་དཔལ་སྥུག་ཏུ་བཞུགས་སྐབས་དག་སྣང་དུ་གསུང་ངག་གནང་བའི་ཐུགས་ཉམས་ཤར། ཡར་ཀླུངས་བཀྲ་ཤིས་རྩེ་ཆོས་སྡེར་ལམ་འབྲས་འཛུགས་པ་མཛད་སྐབས་འོད་གསལ་དུ་ཡང་ཡང་ཞལ་གཟིགས། འདར་རྣམ་རྒྱལ་སྟག་རྩེར་མནལ་ལམ་དུ་རྗེ་བླ་མའི་ཞབས་གཉིས་དབུ་གཙུག་ཏུ་བཞག་ཕྱག་གཉིས་ཀྱིས་ཞལ་འགྲམ་སྐྱོར་ནས་བྱིན་རླབས་གནང་དུས་ཨྱོན་དངོས་ཡིན་དགོངས་པའི་ཚེ་དེའི་སྐུར་གྱུར། རྣམ་པ་དེ་ལྟར་ཤར་ཡང་ངོ་བོ་ཕ་བླ་མར་ཐག་ཆོད་པའི་མོས་གུས་ཀྱི་ངང་ནས་མནལ་སད་ཚེ་དབུ་གཙུག་ཏུ་ཞབས་དྲོད་ཀྱིས་ཚ་ཆིལ་ལི་བ་བྱུང་བས་མཚོན་ཏེ་དངོས་སློབ་ཡང་སློབ་མང་པོར་ཞལ་སྟོན་ཆོས་གསུང་བྱིན་རླབས་གེགས་སེལ་བོགས་