[A:༦༠༥]ཐམས་ཅད་མཁྱེན་པས་ཟུར་བཞུགས་གནང་ཕྱིན་ཆོས་རྗེ་གནས་གསར་བ་ལས་འོས་པ་གཞན་མེད་དོ་ཞེས་མགྲིན་གཅིག་དབྱངས་གཅིག་ཏུ་གླེངས་ཏེ། སྡེ་སྲིད་རིན་ཆེན་སྤུངས་པ་ལ་སྙན་འབུལ་ཕུལ་བ་ལའང་ཤིན་ཏུ་ལེགས་པའི་དགོངས་བསྟད་བཟང་པོའི་བདེ་ཁྲོལ་དང༌། གཙོ་བོར་རྗེ་ཉིད་ཀྱི་ཐུགས་རྗེའི་གཟིགས་པ་ལྷོད་པ་མེད་པ་སོགས་རྒྱུ་རྐྱེན་རྣམས་འཛོམ་པར་བརྟེན་ཞ་ལུ་སྤྱི་སོས་མཁན་པོའི་སྙན་གསན་ཕུལ་བར། རྗེ་བླ་མའི་དགོངས་བསྟད་དང་བཅས་བཟློག་མ་བདེ་བར་ལོ་གཅིག་གི་ཞལ་ལེན་གནང་བ་ན་རྗེ་ཉིད་ཀྱིས་ངས་ལོ་གསུམ་ཁྱེད་ཀྱིས་ལོ་གཅིག་མཛད་ན་སྡེ་དགོན་ཚོས་ཕྱག་རྟེན་ཀྱང་མི་འབྱོར་བས་གསུམ་ངེས་པར་མཛོད། དེ་ནས་མཛད་བདེ་མི་བདེའི་བབས་ལ་གཟིགས་ཆོག །དགོན་སྤག་སྦུག་གཞན་གྱི་བླ་མའི་དོད་མིན་ཆོས་འཇིག་རྟེན་ག་ནས་ཀྱང་རྣམ་གཞག་རྒྱ་ཆེན་པོའི་སླེབ་ཐེབས་ཡོད་ཚུལ་ཕེབས་པ་ལྟར་ཆུ་སྟོད་ཟླ་བའི་ཚེས་གཅིག་རྒྱལ་ཕུར་གྱི་འགྲུབ་སྦྱོར་དུས་མ་ཕམ་མགོན་པོ་རིན་ཆེན་གྲུབ་ཀྱི་གདན་སར་བསྐོ་བ་གནང་བར། སྡེ་སྲིད་རིན་སྤུངས་པའི་བསྐོ་འཇའ་ཁྲི་སྟོན་ཞ་ལུའི་ཆེན་སློབ་དགེ་འདུན་ཡོན་བདག་གཞན་ཡང་ཕྱོགས་ཀྱི་སྡེ་ཕྲན་གྱིས་མཚོན་པའི་བདོག་པ་རྒྱ་ཆེན་པོ་སྤེལ། ཁྱད་པར་མཁན་ཆེན་ཐམས་ཅད་མཁྱེན་པས་བེར་ཟླམ་དབུ་ཞྭ་སོགས་ཀྱི་གནང་སྦྱིན། དཔོན་སློབ་ཚང་མར་འཕྲལ་ཡུན་དུ་དགེ་བའི་བསླབ་བྱ། བཀྲ་ཤིས་མེ་ཏོག་གི་ཆར་ཆེན་པོ་ཕབ། ཆོས་རྗེ་གདན་ས་བས་དཔལ་དུས་ཀྱི་འཁོར་ལོའི་དབང་ཆ་གཉིས་དང་སྦྱོར་དྲུག་གི་འཁྲིད་ཅིག་མཛད། ཡབ་སྲས་ལྷན་རྒྱས་སྡེ་པ་གནས་གསར་བས་མྱུག་ཏུ་བྲོ་བཞས་རྩེད་སྣ་བསུ་བ་སེར་སྦྲེང་གི་བཀོད་