[A:༦༠༤]དགོངས་ནས་ཅིས་ཀྱང་མཛོད་ཅེས་གསུང་བ་ལྟར་དབང་ཆ་གསུམ་ལ་བདེ་ཆེན་རལ་གཅིག་ལྷ་ཉེར་ལྔའི་དབང་བཞི། གཞན་དོན་ནུས་པ་ཁ་ཤས་ལ་བྱིན་རླབས་གཉིས་དང་བདག་པོ་ཆེན་པོའི་དབང་ཡང་གནང་བར་བརྟེན་ཆོས་འདི་སྣུམ་ཟད་ཀྱི་མར་མེ་ལྟ་བུའི་སྲོག་མཐུད་པའང་ཚར་ཆེན་བླ་མ་ཉིད་ཀྱིས་བཀའ་དྲིན་ཁོ་ནར་སེམས་ཤིང༌། རྗེས་སུ་གལ་ཆུང་ཆོས་ལ་བྱས་པའི་རྒྱུན་ནུབ་པར་ཉེ་ནའང་མཁྱེན་བརྩེའི་ཞབས་ཀྱིས་གསན་སྐབས་རིགས་འཛིན་ཆེན་པོའི་མཆོད་དཔོན་བླ་མ་ཨྱོན་རྒྱལ་པོ་ཡོད་འདུག་པ་ནས་དབང་ལུང་གཉིས་ཀ་གང་དཀར་ཕྱོགས་སུ་མེ་སྟག་ཙམ་ཞིག་བྱུང་མོད། ལ་ལར་སྤང་གི་ཤ་མོ་རྡོལ་བ་ལྟ་བུ་ནི་གང་ཡིན་མ་ཤེས། རྗེ་བླ་མས་ཡོས་ལོ་ནས་བཟུང་ལོ་གསུམ་གྱི་བར་གདན་ས་མཛད་ནས་ཀུན་སྤངས་ཀྱི་དགོངས་པ་བསྟོད་པའང་ཐམས་ཅད་མཁྱེན་པ་བུ་སྟོན་རིན་པོ་ཆེ་སྐུ་ན་བགྲེས་སོང་བའི་སྐབས་ཞ་ལུའི་གདན་ས་མི་མཛད་གསུང་བའི་བཀའ་ཕེབས་པས་ཞ་ལུ་བ་རྣམས་ཀྱིས་ནན་ཆེར་ཞུས་པའི་ཚེ་འོ་ན་ལོ་དྲུག་ཙམ་བྱ་ཡི་ཞེས་ཞལ་གྱིས་བཞེས་ནས་གསུམ་སོང་མཚམས་སུ་འཇོག་པ་གནང་བའི་ཚེ་ཞལ་བཞེས་ཀྱི་ལོ་མ་ཐེངས་ཚུལ་ཞུས་པའི་ལན་དུ་སླར་ལོ་གསུམ་བྱེད་གནང་བ་སྐུ་ཚེ་རྟིང་མ་ཞིག་ལ་དགོངས་པའི་ཞལ་བཞེས་གྲུབ་པ་དང༌། སྔར་མཁན་ཆེན་ཐམས་ཅད་མཁྱེན་པའི་བཀའ་ལས། གནས་གསར་ཆོས་རྗེ་ཉིད་བུ་ལུགས་ཀྱི་ཆོས་སྐོར་གསན་པ་དང་ཆོ་ག་ཕྱག་ལེན་གདངས་དབྱངས་ཚུན་ལ་བསླབ་སྦྱང་ཞིབ་མོ་དགོས་པའི་རྒྱུ་མཚན་ཕེབས་པའང་མཁན་ཐོག་ཏུ་འབྱོན་དགོས་པར་དགོངས་པའི་ཡེ་ཤེས་ཀྱི་གཟིགས་པ་གསལ་འགྲིབ་མེད་པའི་ཐོག་ཏུ་བབས་པས་ཞ་ལུའི་ཆེན་སློབ་སོགས་གྲྭ་རིགས་སྦྱིན་བདག་ཀུན་མཁན་ཆེན་