[A:༥༩༥] དེ་མཚུངས་རྗེ་ཉིད་ཀྱིས་རྒྱལ་ཡུམ་ཚུལ་ཁྲིམས་བཟང་མོ་མཇལ་བར་ཕེབས་དུས་ཁྱེད་ལ་འདི་མཁོ་བའི་དུས་ཤིག་འོང་ཅིས་ཀྱང་གསན་མཛོད་ཅེས་ལྷ་མོ་རྡོ་རྗེ་རབ་བརྟན་མའི་རྗེས་གནང་ལུང་རྣམས་རྫོགས་པར་སྩལ་བའི་བླ་མ་གཉིས་ཀྱི་ལུང་བསྟན་དུས་བབས་དང༌། བུ་སྟོན་རིན་པོ་ཆེ་སླར་ཡང་རང་བསྟན་ལ་བསམས་བཞིན་སྐྱེ་བ་བཞེས་པའི་སྨོན་ལམ་གྱི་མཐུ་བརྟས་ཏེ་ཞ་ལུའི་ཆེན་སློབ་ཐམས་ཅད་མགྲིན་གཅིག་དབྱངས་གཅིག་པའི་ཚུལ་གྱིས་མཁན་པོའི་གསོལ་འདེབས་ལ་ཡོང་བའི་སྔོན་དུ་ནུབ་ཅིག་མནལ་དུ་སོང་ཚུལ་བསྟན་པའི་སྲོད་འཁོར་ལ་བུད་མེད་སྨུག་ནག་འཇིགས་སུ་རུང་བ་མཆེ་བ་གཙིགས་ཤིང་རལ་པ་དམར་སེར་རྟིང་པར་སླེབ་པ་ཞིག་བྱུང་ནས་ཁྱེད་ཀྱིས་ཞ་ལུའི་གདན་ས་མཛད་དགོས་ཟེར་བ་ཞིག་བྱུང་བ་དཔལ་ལྡན་མའི་ཆོ་འཕྲུལ་དུ་འདུག་ཅེས་ཞབས་འབྲིང་པ་འདྲ་ལ་གསུངས། ཐོ་རེངས་ཐོག་ཁ་ནས་རྗེ་ཉིད་ཀྱིས་ཞལ་ཤར་དུ་གཟིགས་ཏེ་དུང་དཀར་པོ་ཞིག་བུས་པ་སྐད་ཤིན་ཏུ་ཆེ་བ་བྱུང༌། སང་ཉིན་ཕྱག་ཕྱི་རྣམས་ལ་དེ་རིང་སུ་བྱུང་ཡང་གཏམ་ཁ་མ་ལེན་སོ་མ་སོད་པ་ལས་མེད་ཕེབས་པར་ཅུང་ཟད་སོང་བ་ན་ཁང་རྙིང་སློབ་དཔོན་རྣམ་སྲས། རིན་སྤུངས་བྱམས་པ་བ་སོགས་ཞ་ལུའི་མཁན་པོར་ཕེབས་དགོས་པའི་སྙན་གསན་འབུལ་མི་རྣམས་སླེབས། རྒྱུ་མཚན་གསོལ་བར་ཞལ་གྱིས་མ་བཞེས་པའི་དེ་ནུབ་མནལ་ལམ་དུ་ཀུན་སྤངས་རྗེ་བཞུགས་གདན་དམའ་བ་ལ་ན་བཟའ་ཧྲུལ་ཞིང་ཞལ་མདངས་ངན་པ་ཞིག་བྱས་བཞུགས་ནས་ཁྱེད་ལ་ཞ་ལུའི་གདན་སའི་སྙན་གསན་བྱུང་ངམ་གསུང་བར་བྱུང་ཡང་ཁས་མ་བླངས་གསོལ་བར་སྐྱག་རེ་ལ་ཨ་ངས་ན་ནིང་ནས་ཁྱེད་ལ་བྱས་པ་མིན་པ་ཨེ་ཡིན་གསུང་བ་