[A:༥༩༦]ལུང་བསྟན་དུ་དགོངས་ནས་མཁན་པོའི་ཞལ་བཞེས་མཛད་པའི་མཚན་ལམ་དུ། རྡོ་རིང་རིན་པོ་ཆེ་སྐུ་མདངས་དང་ན་བཟའ་ལེགས་ཤིང་ཤིན་ཏུ་དགྱེས་པའི་རྣམ་འགྱུར་སྟོན་པ་ཞིག་བྱུང༌། དེ་ནས་སྲིན་པོ་ཞེས་པ་ཤིང་ཡོས་སོས་ཀྱི་དགའ་སྟོན་ལ་བབས་པ་འཕྲོད་སྦྱོར་དགེ་བའི་དུས་སྐྱ་རགས་ཀྱིས་ཆིབས་བསུ་དང་འདུས་ཚོགས་རྣམས་ཀྱིས་འཕན་གདུགས་རོལ་མོ་སོགས་མཆོད་པའི་ཡོ་བྱད་ཐོགས་པའི་སེར་སྦྲེང༌། མཆོད་གར་གྱིས་སྣ་དྲངས་པས་མདུན་བསུས་དཔལ་ཞ་ལུ་གསེར་བཀང་གི་ཆོས་གྲ་ཆེན་པོ་སྙིགས་དུས་ཀྱི་རྒྱལ་བ་གཉིས་པ་བུ་སྟོན་རིན་པོ་ཆེའི་སེང་གེའི་ཁྲིར་ཕེབས། དེའི་ཚེ་ནམ་མཁའ་གཡའ་དག་པ་ལ་མེ་ཏོག་གི་ཆར་འདབ་མ་ལྔ་པས་མཚོན་ལྷ་རྣམས་ཀྱིས་མཆོད་པའི་ཆེད་དུ་ཕབ་ཅིང༌། གན་སྤོས་ཀྱི་དྲི་འདྲ་རུང་བ་ལ་ཞིབ་ཏུ་བརྟགས་ན་སྔར་ཚོར་མ་མྱོང་བའི་དྲི་བསུང་གིས་ཁྱབ་པ་སོགས་ངོ་མཚར་བའི་ལྟས་ཕུན་སུམ་ཚོགས་པ་བྱུང༌། སྔོན་མཐུ་ཆེན་གངས་པ་ཤཱཀ་འབུམ་གྱི་སློབ་མ་སྔགས་རྙིང་མ་བཀའ་གཏེར་ཐམས་ཅད་ལ་མཁས་ཤིང་གྲུབ་པ་བརྙེས་པའི་གཡུང་སྟོན་རྡོ་རྗེ་དཔལ་ཞེས་གོས་དཀར་ལྕང་ལོའི་འཕྲེང་བ་འཛིན་པའི་སྔགས་འཆང་ཆེན་པོ་དེས་ཕུང་པོ་རི་བོ་ཆེ་ནས་གཏུམ་མོ་དུག་ཧྲུལ་མའམ། གསར་མ་བ་རྣམས་ཙ་མུནྚི་འབོད་པའི་ཞལ་བརྙན་མ་ཧེའི་གདོང་ཅན་ཞིག་གཏེར་ནས་བཞེས་པ་དང་ཆ་འདྲ་བའི་ཡབ་ཀྱི་ཞལ་འབག་ཅིག་ཀྱང་བཟོས་པའི་རྭ་ནང་དུ་ཐམས་ཅན་མཁྱེན་པ་བུ་སྟོན་ཆོས་རྗེས་གསོལ་ཟན་གྱི་ལྷག་ལ་གཤིན་རྗེ་ཕོ་བརྒྱད་མོ་བརྒྱད་ཀྱི་གཟུགས་བརྙན་ཕྱག་བཟོ་མཛད་པ་བཅུག་པས་བྱིན་རླབས་ཤིན་ཏུ་ཆེ་བར་བྱུང་བ། ཡོས་ལོ་ཟླ་བ་བཅུ་གཉིས་པའི་དམར་ཆ་ལ་བསྟན་འགྲོའི་ཕན་བདེ་སྤེལ་བ་དང་