[A:༥༩༤]རྩེར་བཀོད་དགའ་སྟོན་ལ་རོལ་ཀྱང༌། །ཐུན་མོང་རྗེས་འབྲངས་ལྷ་མིན་དོགས་བྲལ་བ། །སྐལ་ལྡན་ཤིང་རྟ་གཉིས་པ་ས་འདིར་སྣང༌། །ཁྲག་འཐུང་གར་ལ་བཞེངས་པའི་ཞལ་སེན་རྡུལ། །མ་མགོན་མཁའ་འགྲོའི་ཐོར་ཚུགས་རྩེར་འཛེགས་ནས། །བཀའ་རྟགས་རི་མོ་སྡེ་བརྒྱད་གཙུག་འཆར་བ། །རྒྱལ་ཕྲན་འཁོར་སྒྱུར་ལུང་གི་རྗེས་འགྲོ་བཞིན། །འཆི་མེད་ཚེ་བྱིན་བརླབས་པ་གཞོམ་བྲལ་སྐུས། །གསང་བདག་རིག་པ་འཛིན་པ་ནམ་མཁའི་མཚན། །མཁའ་ལ་མཁའ་ཡི་སྦྱོར་བ་ཇི་བཞིན་དུ། །ལག་ན་རྡོ་རྗེའི་འཁོར་ལོར་སྨིན་ཅིང་གྲོལ། །གསོལ་འདེབས་ལས། འདྲེན་པ་མཆོག་གིས་སྔོན་ནས་ལུང་བསྟན་ཅིང༌། །ཆོས་སྐྱོང་ལྷ་མོས་གུས་པས་སྤྱན་དྲངས་ཏེ། །དཔལ་ལྡན་ཞ་ལུའི་ཆོས་ཀྱི་གདན་ཁྲི་ལ། །ཞབས་པད་མཛེས་པར་བཀོད་ལ་གསོལ་བ་འདེབས། །དཔལ་ཕུག་རྣམ་པར་གྲོལ་བའི་ཕོ་བྲང་དུ། །སློབ་བཤད་ཟབ་མོའི་ཆོས་ཀྱི་འཁོར་ལོ་བསྐོར། །མཁས་གྲུབ་སློབ་མས་ས་གསུམ་ཀུན་ཁྱབ་སྟེ། །བསྟན་པ་ཉིན་མོར་མཛད་ལ་གསོལ་བ་འདེབས། །ཞེས་སྔར་མཁྱེན་རབ་རིན་པོ་ཆེས་རྗེ་བཙུན་རྡོ་རིང་པ་ཆེན་པོར་ཞ་ལུའི་གདན་ས་མཛད་པ་འཆར་ཤས་ཁ་བས་ངེད་ཀྱི་ཚ་བོ་འདི་ལའང་མགོ་འདོན་ལེགས་པོ་མཛོད་གསུང་པར་བདག་དེ་འདྲ་མི་བྱེད་ཞུས་པས་ཁྱེད་མི་མཛད་ན་ཉིད་ཀྱི་གྲྭ་པ་ཞིག་ལ་ངེས་པར་འོང་གསུངས་པར་བརྟེན། རྡོ་རིང་རིན་པོ་ཆེས་སྔར་གྱི་ལོ་རྒྱུས་དང་བཅས་བྲག་དཀར་སེམས་དཔའ་ཆེན་པོར་ཁྱོད་མཁན་པོ་མཛད་དགོས་པ་ཡོང་ཤས་ཆེ་གསུངས་པའི་ལན་དུ་བདག་གིས་ཡོང་ཡང་མི་ཡོང་བྱེད་ཀྱང་མི་བྱེད་ཞུས་པས་དེས་ན་ཆོས་རྗེ་ཚར་པས་མཛད་འགྲོ་ཉེན་ཆེ་གསུངས་པ་དང༌།