[A:༥༩༣]། སླར་གྲུབ་ཐོབ་ཏུ་བཏགས་པའི་བླུན་པོ་འགའ་རེའི་རྐང་པ་ལ་གཏུག་དགོས་བསམས་པའི་བློ་རྩ་བ་ནས་བུད་ལམ་དང་ལམ་མིན་པའི་ཤན་ཆོད་པ་ཞིག་བྱུང་སྟེ། འཇམ་དཔལ་ཁྲོས་པ་དུས་དགྲའི་དབང་པོ་དེས། །འཇམ་པའི་དབྱངས་ཀྱིས་ཐུགས་བཅུད་འདི་བསྟན་ཚེ། །འཇམ་དབྱངས་བཞེད་པའི་དོན་དེ་ཁོ་བོས་རྟོགས། །འཇམ་དབྱངས་དངོས་སུ་བྱོན་ཀྱང་ཞུ་རྒྱུ་མེད། །ཅེས་གསུངས། རིམ་བཞིན་བསྟན་པའི་སྦྱིན་བདག་ཆེན་པོའི་ཐུགས་ངོ་དང་བསྟུན་འོ་ཡུག་སྡིངས་མར་ཕེབས་ཐུགས་སྲས་མཁྱེན་བརྩེའི་དབང་ཕྱུག་ལ་རྗེ་བཙུན་ཡབ་དང་ཐུན་མོང་བའི་རྩ་དབུ་མའི་འཁྲིད་སོགས་སྩལ། དེ་ནས་རྗེ་བླ་མས་ཀུན་མཁྱེན་མཁྱེན་བརྩེ་ལ་ད་ལོ་ཞ་ལུར་གནས་སྐོར་དང་སྦྲགས་ནས་བྱོན་བུ་ལུགས་ཀྱི་དབང་རྣམས་ཐོབ་ན་མ་ཐོབ་ན་མཛོད། ཆོས་ལུང་དུ་བཞུགས་མཁན་ཁྲི་ཁང་རྗེ་བཙུན་མ་རང་ཁུངས་དག་པས་དེར་ཞུ་བ་དང་རྣམ་སྲས་ཀྱི་དབྱངས་རོལ་འདྲ་ཡང་རྩད་གཅོད་དགོས་པའི་བསླབ་སྟོན་གནང་བ་ནི་ཡབ་སྲས་གཉིས་ཀ་ཞ་ལུའི་མཁན་ཐོག་ཏུ་ཕེབས་པའི་མངོན་མཁྱེན་དུ་མཆིས། རྗེ་འདི་ཉིད་དབུས་ནས་མགྱོགས་འཁོར་ཞིག་མཛད་ནས་ཁྲི་ཁང་དུ་ཕེབས་དུས་རྗེ་མཁྱེན་བརྩེའི་དབང་ཕྱུག་ལ་བདེ་མཆོག་ནག་པོ་པའི་དབང་དང་ཞལ་བཞི་པའི་གསང་འཁྲིད་གནང༌། རྗེའི་དྲུང་ནས་ཀྱང་གསེར་དངུལ་སོགས་འབུལ་བ་སྟོབས་ཆེ་བ་བསྟར་རོ། །མང་ཐོས་ནོར་བུའི་གདེངས་ཅན་ཀླུ་ཡི་དབང༌། །རིག་པ་སྲིད་སྒྲུབ་མདའ་བཞིན་རབ་དྲང་བས། །རྒྱ་ཆེན་གཞུང་བརྒྱ་སྨྲ་ལ་མཚོ་བྱུང་མ། །སྙིང་ཞུགས་མཁས་དེས་ཁྱོད་ཞབས་གཙུག་ཏུ་བསྟེན། །སློབ་བཤད་ཁྱབ་འཇུག་རྐང་ཏོག་སྣོད་ལྡན་གྱི། །རྒྱལ་མཚན་