[A:༥༩༢]དེ་ནས་ཞག་གསུམ་གྱི་རིང་གསང་བདག་གི་དཀྱིལ་འཁོར་དུ་བཅུག་སྟེ་མཚན་བྱང་ལ་དབང་བསྐུར་ལམ་སྟོན་མཛད་པས་ཞག་འགའ་ཞིག་སོང་བ་ན་འབྲུག་གི་སྒྲ་སྙན་པོ་བྱུང་བའི་རྐྱེན་གྱིས་གཟིགས་པའི་ཚེ་ནོར་བུ་མིག་གསུམ་པ་འོད་ཟེར་འཕྲོ་བས་གཟིམས་ཆུང་གི་ནང་གང་བ་བྱུང་བས་སྡེ་པ་དེ་གནོད་སྦྱིན་བདེ་ལྡན་འོད་ཟེར་ཞེས་འབྲུག་གི་གཞོན་པ་ཅན་གྱི་རྣམ་པར་ལྕང་ལོ་ཅན་དུ་སྐྱེས་ཏེ། དཔལ་གསང་བའི་བདག་པོས་རྗེས་སུ་བཟུང་བས་རྗེ་འདི་ཉིད་ལ་དྲིན་ལན་བསབ་པའི་ཆེད་དུ་ནོར་བུ་ཕུལ་བར་སྣང༌། སྡེ་པ་གཤེགས་རྗེས་རྗེ་བླ་མ་བོ་དོང་ནས་མྱུར་དུ་ཕེབས་འཇམ་དབྱངས་མཁྱེན་བརྩེའི་དབང་ཕྱུག་གཙོ་བོར་གྱུར་པའི་ཞལ་ངོ་རྣམས་དང་དོན་གཉེར་ཅན་ཉི་ཤུ་སྐོར་ལ་ནཱ་རོ་ཏ་པའི་སློབ་བཤད་ཀྱི་བྱིན་རླབས། རྩ་དབུ་མའི་ཉམས་འཁྲིད་ཟབ་མོ་དང་ཆོས་སྐོར་རྣམས་སྩལ། སེམས་ཉིད་གསལ་སྟོང་གསང་བའི་རྗེ་བཙུན་མ་གཅེར་མཐོང་དུ་ངོ་སྤྲད་པར་བརྟེན། མཁྱེན་བརྩེའི་གསུང་ལས། ཨ་ཧོ་རྒྱལ་ཡུམ་དབང་མོས་མངོན་སུམ་དུ། །དུ་མའི་སྐྱེ་བར་རྗེས་བཟུང་བླ་མ་མཆོག །མཆོག་འདིས་ཟབ་མོའི་ཉེ་ལམ་འདི་བསྟན་ཚེ། །ཚེ་འདིར་མཁའ་སྤྱོད་སྒྲུབ་ལ་ཐེ་ཚོམ་བྲལ། །ཞེས་གསུངས། རིམ་གྱིས་ཤངས་སྲེག་ཤིང་རིན་ཅེན་སྒང་གི་དགོན་པར་སྡེ་པ་གནས་གསར་བས་སྤྱན་དྲངས་པ་བཞིན་ཕེབས། དཔལ་ལྡན་ཆོས་སྐྱོང་གི་ཐུགས་བཅུད་འཇམ་དཔལ་དམར་པོའི་དབང་བྱིན་རླབས། ཟབ་ལམ་སྤྲོས་པ་མེད་པའི་ཉམས་འཁྲིད་ཟབ་མོ་ཤིན་ཏུ་སྨིན་པར་གནང་བས། མཁྱེན་བརྩེའི་གསུང་ལས། དཔེ་ནག་བལྟས་པའི་བཤད་ཡམས་ཙམ་མ་ཡིན་པར་ཐུགས་ཉམས་སུ་ཇི་ལྟར་མྱོང་བ་བཞིན་བསྟན་པས་སེམས་ཀྱི་སྒྲོ་འདོགས་ཐམས་ཅད་དེར་ཆོད