[A:592]de nas zhag gsum gyi ring gsang bdag gi dkyil 'khor du bcug ste mtshan byang la dbang bskur lam ston mdzad pas zhag 'ga' zhig song ba na 'brug gi sgra snyan po byung ba'i rkyen gyis gzigs pa'i tshe nor bu mig gsum pa 'od zer 'phro bas gzims chung gi nang gang ba byung bas sde pa de gnod sbyin bde ldan 'od zer zhes 'brug gi gzhon pa can gyi rnam par lcang lo can du skyes te/ dpal gsang ba'i bdag pos rjes su bzung bas rje 'di nyid la drin lan bsab pa'i ched du nor bu phul bar snang / sde pa gshegs rjes rje bla ma bo dong nas myur du phebs 'jam dbyangs mkhyen brtse'i dbang phyug gtso bor gyur pa'i zhal ngo rnams dang don gnyer can nyi shu skor la nA ro ta pa'i slob bshad kyi byin rlabs/ rtsa dbu ma'i nyams 'khrid zab mo dang chos skor rnams stsal/ sems nyid gsal stong gsang ba'i rje btsun ma gcer mthong du ngo sprad par brten/ mkhyen brtse'i gsung las/ a ho rgyal yum dbang mos mngon sum du/ /du ma'i skye bar rjes bzung bla ma mchog /mchog 'dis zab mo'i nye lam 'di bstan tshe/ /tshe 'dir mkha' spyod sgrub la the tshom bral/ /zhes gsungs/ rim gyis shangs sreg shing rin cen sgang gi dgon par sde pa gnas gsar bas spyan drangs pa bzhin phebs/ dpal ldan chos skyong gi thugs bcud 'jam dpal dmar po'i dbang byin rlabs/ zab lam spros pa med pa'i nyams 'khrid zab mo shin tu smin par gnang bas/ mkhyen brtse'i gsung las/ dpe nag bltas pa'i bshad yams tsam ma yin par thugs nyams su ji ltar myong ba bzhin bstan pas sems kyi sgro 'dogs thams cad der chod