[A:༥༧༨]པ་གཉན་སྟོན་སྦས་པའི་རྣལ་འབྱོར་གྱི་རྣམ་སྤྲུལ་མཁན་རིན་པོ་ཆེ་གཞོན་ནུ་བློ་གྲོས་ཆེད་བསྟད་ཀྱིས་ཕེབས། བླ་མ་འདི་ཉིད་བསྟན་འཛིན་གྱི་སྐྱེས་བུ་ཆེན་པོར་དགོངས་ཏེ་གསུང་ངག་རིན་པོ་ཆེ་མཁའ་སྤྱོད་སྐོར་གསུམ། དམར་པོ་སྐོར་གསུམ་སོགས་གསེར་ཆོས་མགོན་པོ་ཆེ་ཆུང༌། གནོད་སྦྱིན་བེག་ཙེ་སོགས་ཀྱི་དབང་རྗེས་གནང་འཁྲིད་ལུང་མན་ངག་རྣམས་འདི་ནས་བཟུང་སྔ་ཕྱིར་མཇལ་བ་ཚོར་རིམ་གྱིས་སྩལ་ཞིང་གཞན་ཡང་བསྟན་པ་སྤྱི་སྒོས་ཀྱི་གསུང་ཆོས་ཇི་སྙེད་ཅིག་གནང༌། མཁན་ཆེན་ཉིད་ཀྱི་གསུང་ལས་ཀྱང་དེང་རང་འགྲོ་དོན་ཁྱོངས་ཆུང་བས་འཆད་འཆད་ཉུང་གསུང་བ་ལྟར་ཆོས་བཀའ་དོག་པ་ཙམ་ཡོད་ཚོད་དུ་འདུག་ཅིང༌། དཔོན་ཡོལ་བ་བླ་ཆེན་དུ་གྲགས་པས་རགས་རིམ་གསན་ཚོད་དུ་འདུག་རུང་ཁོང་པ་རྗེས་སོར་རྟགས་བརྟན་སྤྲུལ་སྐུར་ཧ་ཅང་མོས་དྲག་པའི་སྐྱོན་གྱིས་རང་བསྟན་ཟིན་པའི་རྗེས་ཆེ་བ་མ་བྱུང་ཞིང༌། ཞལ་སློབ་འདི་ཐོན་གྱི་གྲགས་མི་ཆེའང་དབུས་གཡོ་རུའི་ཕྱོགས་སུ་བཀྲ་ཤིས་ཆོས་ཀྱི་སྡེ་གསར་དུ་བསྐྲུན་པས་བསྟན་པའི་མེ་བཙའ་ལྟ་བུར་སོང༌། བདག་ཆེན་རིན་པོ་ཆེ་འཇམ་དབྱངས་བསོད་ནམས་དབང་པོ་ཐུགས་བློ་གཟུ་བོར་གནས་པས་ཡར་ཀླུངས་བཀྲ་ཤིས་རྩེར་ཕེབས་ནས་བྲག་རྫོང་མའི་འཁྲིད་ཀྱིས་གཙོས་སྙན་བརྒྱུད་ཀྱི་ཆོས་སྐོར་མང་དུ་གསན། གསང་འཁྲིད་སྐོར་རེ་ཞིག་ཕུལ་བ་མི་འགབ་འདྲ་དགོངས་ཏེ་མ་གསན་གསུངས་པ་མཁན་རིན་པོ་ཆེའི་གསན་ཡིག་བཙེམས་མ་བྱ་རོག་གིས་ཁྱེར་ཏེ་བདག་ཆེན་རིན་པོ་ཆེའི་སྐུ་པང་དུ་བསྐྱུར་བས་ཆོས་སྐྱོང་གིས་གདམས་པ་རྣམས་གཏོད་ཅིག་ཅེས་སྐབས་དབྱེ་བ་ལྟ་བུས་དཔོན་སློབ་གཉིས་ཀའི་ཆེ་བར་སོང་ཞིང༌། ཐུགས་ཡིད་