[A:༥༥༥]གསལ་བར་ཐུགས་ཤིན་ཏུ་མཉེས་པའི་སྒོ་ནས་ཕྱག་ཐུགས་ཀར་ཐལ་མོ་སྦྱར་ཏེ་རྗེས་སུ་ཡི་རང་དང་བསྔགས་པ་རྒྱ་ཆེན་པོ་མཛད། བླ་མ་དམ་པ་འདི་ཉིད་ཀྱང་ཐུགས་དད་ཤུགས་དྲག་པོའི་རྐྱེན་གྱིས་སྤྱན་ཆབ་འཁྲུག་པ་སོགས་ཕན་ཚུན་འབྲལ་མི་ཕོད་པ་ལྟ་བུའི་ཐུགས་ཡིད་གཅིག་འདྲེས་སུ་གྱུར། དེ་ནས་མི་འགྱངས་པར་དཔལ་འདམ་བུ་བྱིན་གྱི་ཆོས་གྲྭ་དང་སྣ་ནམ་རྡོ་རྗེ་བདུད་འཇོམས་ཀྱི་རྣམ་སྤྲུལ་ཐུ་བཙུན་ཀུན་དགའ་རྣམ་རྒྱལ་གྱི་གདན་ས་གོང་དཀར་རྡོ་རྗེ་གདན་དུ་ཕེབས་ཏེ། སྨིན་གྲོལ་ལུང་མན་ངག་སོགས་ཟབ་རྒྱས་ཆོས་ཀྱི་སྒོ་འཕར་ཕྱེ་ནས་གདུལ་བྱ་རྣམས་བཟང་པོའི་སྐལ་བ་ཅན་དུ་བཀྲི་བར་མཛད། ཐུབ་བསྟན་དགེ་ཚོགས་འཕེལ་ནས་ཐོས་བསམ་འབྲས། །ཡུལ་ལྗོངས་སྐྱེད་ཚལ་བར་གྱི་ཟློས་གར་གཏམ། །བཅད་ལྷུག་སྤེལ་ལེགས་ཉམས་འགྱུར་དབྱངས་ཅན་མ། །མགྲིན་པར་བྱོན་ནས་གསུངས་ཀྱང་དེ་ལས་ཅི། །ས་སྐྱའི་རིང་ལུགས་མཐོར་བརྩེགས་ཁ་བའི་རིར། །ཀར་མཚན་ན་བུན་འཁྲིགས་པའི་བཤེས་གཉེན་དང༌། །ཐུགས་ཡིད་འདྲེས་པའི་མཛའ་བཅིངས་ཞགས་པ་དེ། །འབྲོམ་སྟོན་ནག་ཚོའི་རྣམ་ཐར་གཉིས་པ་བཞིན། །འཕགས་བོད་གཞུང་བརྒྱ་སྨྲ་བའི་ཆོས་གྲགས་དང༌། །ངེས་གསང་ཐེག་པ་མཆོག་གི་སྡེ་ཆེན་པོར། །སྐལ་བཟང་སྐྱེ་རྒུའི་བུང་བ་ཚིམ་བྱེད་པའི། །བཤེས་གཉེན་པད་དཀར་འདབ་སྟོང་དེང་འདིར་འཛུམ། །གསོལ་འདེབས་ལས། བདེ་བ་མཆོག་གི་ཕོ་བྲང་སྲིན་པོ་རིར། །སླར་ཡང་རྡོ་རྗེ་བཙུན་མོའི་རྣམ་སྤྲུལ་གཟིགས། །མཁའ་སྤྱོད་དགའ་མའི་མཛེས་སྐུ་སྙན་གྲགས་ཅན། །རྩོལ་མེད་ཐུགས་རྗེས་མཇལ་ལ་གསོལ་བ་འདེབས། །ཆུ་