[A:༥༥༤]རྟེན་འབྲེལ་འགྲིག་གམ་སྙམ། རྗེ་མི་བསྐྱོད་རྡོ་རྗེས་རེས་གསང་སྔགས་རྙིང་མ་ཆོས་ལོག་དང་སྐབས་འགར་གཏེར་ཁ་འོག་མའི་ཚེས་བཅུ་འཛུགས་པ། འབྲི་གུང་ཟུར་བ་རིན་པོ་ཆེ་དང་མཇལ་དུས་བསྙེན་ཕུར་སོགས་སྔགས་ཆས་རྣམས་དབུ་ཐོག་ཏུ་བཞག་ནས་ང་ཡང་འདི་འདྲ་བ་ཞིག་འདོད་ཅེས་གུས་པར་མཛད། སྣེའུ་སྡོང་གོང་མ་ཆེན་པོར་ཕུལ་བའི་ཆབ་ཤོག་ཏུ། དེང་སང་དབུ་རུ་བྱང་ཕྱོགས་བརྒྱུད་འདི་ན། །གཏེར་སྟོན་ལྕང་ལོ་ཅན་ཞེས་བདུད་སྤྲུལ་དེ། །ཞེས་དང༌། བླ་མ་གཏེར་གྲོ་བར་ཟློ་བཞེས་ཐུགས་རྣལ་དུ་མི་གནས་པའི་གསུང་རིགས་དང་མཛད་པ་སྣ་ཚོགས་ལ་དང་བ་མི་སྐྱེ་བ་ནི་ཐུགས་བདེན་པར་མ་ཟད། སྒར་ཆེན་འཛམ་གླིང་རྒྱན་ཟེར་བའི་སྟོང་འུར་ལ་སྐུའི་བ་སྤུའི་ཆ་ཤས་ཙམ་ཡང་མི་ལྡང་བ་རྗེ་བཙུན་ཁའུ་པའི་སྤྱན་སྔར་ཕེབས་པ་ནས་བཟུང་བླ་མ་དང་ཆོས་གཞན་ལ་བརྟེན་ནས་བྱང་ཆུབ་མི་སྒྲུབ་པའི་དབང་རྣོན་ཆོས་རྗེས་འབྲང་བའི་ཐུགས་མོས་ལ་ལྷག་པར་ངེས་རྙེད་ཀྱིས་ལག་པད་སྙིང་གར་ཟུམ་མོ། །རིམ་གྱིས་ལྷ་མཐོང་བའི་རྫོང་ལྷུན་གྲུབ་རབ་བརྟན་དུ་ཕེབས། ཞལ་ངོ་རྣམས་ལ་ཚེ་རྟ་སྦྲགས་མའི་དབང་སོགས་བཀའ་དྲིན་དུ་སྩལ། སྨྱུག་ལ་རྫོང་དུ་རྗེ་ཀརྨ་འཕྲིན་ལས་ཕྱོགས་ལས་རྣམ་རྒྱལ་དུ་གྲགས་པ་མཇལ་དུ་ཕེབས། དེར་བདུད་མགོན་ཞིང་སྐྱོང་སེང་གདོན་ཅན་དང་དམ་ཅན་མགར་ནག་སོགས་ཀྱི་ཆོས་བཀའ་ཅི་རིགས་གསན། སྤྱིར་རིས་མེད་པའི་བསྟན་རྒྱུན་ལ་དགོངས་པའི་འཆད་ཉན་དང་ཁྱད་པར་རྗེ་འཕྲིན་ལས་པ་ཉིད་ཀུན་མཁྱེན་བཀྲས་རྣམ་པའི་དབོན་པོར་སོང་བའི་ཐུགས་ཞེན་གྱིས་ནཱ་ལེནྡྲར་ཕན་ཐོགས་མཛད་དགོས་པའི་བསླབ་བྱ། གོང་དཀར་ཆོས་སྡེར་ཕེབས་རྩིས་ཀྱིས་རྒྱུ་མཚན་