[A:༥༣༦]སྤྱོད་བྱས་པས་གྲྭ་པ་རྣམས་བྱོན་བྱུང་ནས། །འདི་པ་ཆ་ལུགས་སོགས་རྟོགས་ལྡན་དུ་མི་འདུག །གྲ་མཐུན་ལ་སྐྱིང་མདོག་རྣམ་པ་སྒོ་ཡངས་པ་ཞིག་འདུག་པས། སྡེ་པ་ཟིལ་གནོན་པ་ལྟ་བུ་ཞིག་བརྫུས་པ་ཡིན་ནམ་ཟེར། གཅིག་ན་རེ་ང་དང་ཞལ་འདྲིས་ཡོད། སྡེ་པ་ཟིལ་གནོན་པ་ཡིན་ཐག་ཆོད་འདུག་ཟེར་བས། ཕལ་ཆེར་དེ་ལ་ཡིད་ཆེས་སོང༌། སུ་ཡིན་ཟེར་བ་ལ། ང་ཅི་མེད་ཀྱི་སྤྲང་པོ་ཡིན་པ་བློ་བདེ་བྱ་བ་ཡིན་ནོ་ཨང་བྱས་པས། ཁྱོད་རང་སུ་ཡིན་ཀྱང་ཉམས་དགའ་ལ་སྣང་བ་བདེ་བ་ཞིག་འདུག་ཟེར་རོ། །ཐག་ཁྲ་སྦྲུལ་དུ་འཁྲུལ་པའི་སྣང་ངོ་ན། །འཇིགས་སྐྲག་འབྲོས་ལ་ཐུག་པ་དོན་བྱེད་ནུས། །ཡིད་ཆེས་མོས་གུས་ལྡན་པའི་གང་ཟག་ལ། །ཁྱི་སོ་རིང་བསྲེལ་ཕུང་པོར་སོང་ངོ་སྐད། །མིང་ཙམ་བརྡ་ཙམ་བཏགས་པ་ཁོ་ན་ལའང༌། །རང་རང་ངོ་བོས་གྲུབ་པ་རྡུལ་ཙམ་མེད། །ཅི་མེད་ཅིར་ཡང་འཆར་བའི་ངོ་མཚར་ཅན། །རྟེན་འབྲེལ་ཟབ་མོའི་རང་མཚང་དེ་རུ་རིག །སྐྱེ་བོས་བཞི་མདོར་སྨྲ་བའི་ཁུངས་མེད་གཏམ། །གང་ཟེར་བདེན་པར་འཛིན་པའི་བློ་ཆུང་ཚོས། །གཞི་མེད་རི་བོང་ཅལ་གྱི་སྒྲ་དབྱངས་ཀྱིས། །རང་གཞན་མང་པོའི་རང་མཚང་སྟོན་ཉེན་གདའ། །ཞེས་བྱུང༌། གསོལ་འདེབས་ལས། ཆུ་མིག་ནང་གི་རྟེན་མཆོག་མཐའ་དག་མཇལ། །ཟབ་ལམ་རྡོ་རྗེའི་ཕོ་བྲང་ཨེ་ཝཾ་དུ། །སྐལ་བཟང་རང་རང་བློ་དང་འཚམ་པ་ཡི། །ཆོས་ཀྱི་དགའ་སྟོན་སྤེལ་ལ་གསོལ་བ་འདེབས། །ཞ་ལུ་གསེར་བཀང་ཆོས་གྲྭ་ཆེན་པོ་རུ། །བསྟན་སྲུང་ལྷ་མོའི་རྣམ་སྤྲུལ་བུད་མེད་གཟིགས། །མཚན་ཉིད་ཀུན་ལྡན་ཡོངས་འཛིན་ཀུ་སཱ་ལིས། །དབང་དང་རྗེས་གནང་སྩལ་ལ་གསོལ་བ་འདེབས། །ཞེས་