[A:༥༣༧]པ་ལམ་ཡིག་ལས། སྟག་ལ་སྐྱ་མོ་དུང་གི་སྒོ་བརྒལ་ཏེ། རྗེ་བཙུན་ས་སྐྱ་པའི་གདུང་བརྒྱུད་རིམ་པས་བྱིན་གྱིས་བརླབས་པའི་གནས་གཙང་ཆུ་མིག་རིང་མོར་སླེབ། དེ་ནུབ་གནས་འབྲེལ་བྱས། སྔོན་ཟངས་དཀར་ལོ་ཙཱ་བས་བཞེངས་པའི་གཙུག་ལག་ཁང༌། གཉན་སྒྲོལ། འཕགས་པ་རིན་པོ་ཆེའི་སྐུ་འདྲ་སོགས་བཞུགས་པའི་ལྷ་ཁང༌། བདག་ཆེན་རིན་པོ་ཆེ་གྲགས་བློ་བས་བཞེངས་པའི་མགོན་ཁང་སོགས་མཇལ། གསོལ་གདབ་སྨོན་ལམ་ཡིད་ཆེས་པར་བྱས། །དེ་དག་ལ་ངོ་མཚར་ཞིང་བྱིན་རླབས་ཀྱི་ཟིལ་གཞན་དང་མི་འདྲ་བ་ཞིག་འདུག་པས་དད་མོས་ཚད་མེད་པ་སྐྱེས། དེང་སང་ཞབས་ཏོག་བདག་རྐྱེན་ཆེར་མེད་པའི་གོགས་ཉམས་ཆེན་པོ་འདུག་པ་ལ་སེམས་ཀྱིས་མི་བཟོད་པའི་སྐྱོ་སྣང་ཡང་ཡོད་པ་ཞིག་བྱུང༌། སང་ཉིན་ཉི་མ་ཕྱེད་ཡོལ་ཙམ་ན་ངོར་ཨེ་ཝཾ་ཆོས་ལྡན་དུ་སླེབ། མཛོ་མོ་ར་བ་ཡོད་པའི་སྤང་སྟེང་དེར་ལྕོག་སྒར་བྱས་བསྡད། ལམ་ཟབ་ལྷ་ཁང་དུ་བླ་མའི་རྣལ་འབྱོར་རྒྱས་པ་ཞིག་བླངས། སྤྱི་སྒོས་ཀྱི་བསྟན་པ་རྒྱས་པའི་སྨོན་ལམ་བཏབ་གཞན་ཡང་ལམ་འབྲས་ལྷ་ཁང་གིས་གཙོ་བྱས་པའི་རྟེན་གསུམ་རྣམས་ཀྱང་མཇལ། དབོན་པོ་རིན་ཅེན་སེང་གེ་བས་གཞིས་ལེན་སྐབས་བབ་བྱས། ཁྲོམ་ཐོག་དཔོན་པོ་སོགས་འདོད་ཆོས་དགོས་ཟེར་བ་མང་དག་བྱུང་བས། ཐོག་ཅིག་ལ་གུར་མགོན་གྱི་རྗེས་གནང་བྱས། འཕྲལ་མཁོའི་ཇ་གོས་དར་སོགས་འབུལ་བའང་འགའ་བྱུང༌། དེ་ནས་ཞ་ལུ་ལ་ཆས་ཏེ་ཕྱིན་པའི་ལམ་བར་ནས་ལྕགས་སྟོད་མཐོང་བྱུང་བས། ངེད་ཚོ་ས་སྐྱ་པའི་ཡུས་པོ་ཆེའི་མི་གསུམ་གྱི་ནང་ནས། ཤར་སྨད་བཙོང་ཁའི་