[A:༤༡༠]ཡོད་པའི་མཚན་གཞི་ཤར་ཕྱོགས་ནག་པོ་པར་གྲགས། དེ་ནས་ཏཾ་བྲ་པྲ་ཏི་མའི་རྒྱལ་པོ་ཛིམ་གིམ་ཞེས་བྱ་བས་འཇོན་དམར་ལས་གྲུབ་པའི་དབང་ཕྱུག་གི་སྐུ་ཞལ་གསུམ་ཕྱག་དྲུག་པ་ཁྲུ་བརྒྱད་ཅུ་ཡོད་པ་ཞབས་རྡོས་བསྣུན་ཏེ་གནས་ཁང་ནས་བསྐྲད་པ་ཁ་བུབ་ཏུ་འགྱེལ་བར་མུ་སྟེགས་པ་རྣམས་ཀྱིས་གསོལ་བ་བཏབ་པས་འབྲས་ཆན་ཙམ་གྱིས་མཆོད་པའི་དམ་བཅའ་འཛིན་དུ་བཅུག་སྟེ་གྱེན་དུ་བསླང་བ་སོགས་མུ་སྟེགས་གྲངས་མེད་བཏུལ། ལྷ་མོ་ཙཎྜི་ཀའི་རྡོ་སྐུ་རང་བྱོན་ཞིག་གནས་སར་མི་བྱུང་ཚད་རང་བྱུང་གི་ཏྲི་ཤུ་ལས་བསད་པའི་རོ་ལ་ཚོགས་འཁོར་བྱེད་པའི་རྣལ་འབྱོར་མ་རྣམས་ནང་པའི་བསྟན་པ་ལ་བཀོད། དེ་ཝཱི་ཀོ་ཊིའི་རི་སུལ་གྱི་ཐུགས་རྗེ་ཆེན་པོའི་རྡོ་སྐུའི་དྲུང་དུ་ཕེབས་པའི་ཚེ་ཐུགས་རྗེ་ཆེན་པོས་ཁྱོད་ཀྱི་ནུས་པས་རི་རབ་བརླག་པར་ནུས་ཀྱང་སེམས་ཅན་གྱི་ལས་ཟད་པ་མེད་པས་མུ་སྟེགས་རྣམས་ལ་གནོད་པ་མ་བྱེད་ཅེས་གསུངས་པ་སོ་བ་ནཱ་ཐ་བཏུལ་ནས་བཀའ་བཞིན་སྒྲུབ་པར་དམ་བཅས། སོ་བ་ནཱ་ཐའི་མུ་སྟེགས་པ་རྣམས་བཏུལ་ནས་ནང་པའི་སྡེ་བཙུགས། སློབ་དཔོན་ནག་པོ་པ་ཤར་ཕྱོགས་ཀྱི་ཕྱི་པའི་རྒྱལ་པོ་གདུག་པ་ཅན་འདུལ་བ། ཌཱ་མ་རུ་པ་རྗེས་སུ་འཛིན་པ། ཨྱོན་ནས་རྡོ་རྗེའི་ཚིག་རྐང་གི་རྒྱབ་བརྟེན་དུ་གྱུར་པའི་ལུང་སྐོར་སྡེ་ལྔ་སྤྱན་འདྲེན་པའི་དོན་གསུམ་ལ་བརྫངས། སློབ་དཔོན་ཉིད་ཐུགས་རྗེ་ཆེན་པོའི་བཀའ་བཞིན་རེ་ཞིག་བརྟུལ་ཞུགས་ཀྱི་སྤྱོད་པའི་འཕྲོ་བཤོལ་ནས་རྡོ་སྐུར་ཐིམ་མམ་ཟེར། ལ་ལ་སྐུ་དངོས་རྡོའི་རྣམ་པར་སོང་བ་གླེངས། དེ་ཡང་འཇམ་དཔལ་རྩ་རྒྱུད་ལས། ཡི་གེ་དྷ་ཞེས་སྡོམ་བརྩོན་ཉིད། །ལྷོ་ཡི་ཕྱོགས་སུ་རྣམ་པར་གྲགས། །ཕ་རོལ་རྒོལ་བ་བཟློག་ནས་ཀྱང༌། །དེ་